प्रधानमन्त्री केपी शर्मा ओलीसँग आज (बिहीवार) प्रतिनिधि सभामा हुने प्रश्नोत्तर कार्यक्रम आम जनता पार्टी (आजपा)का सांसद प्रभु साहले बहिस्कार गर्ने भएका छन् ।

यसअघिको प्रश्नोत्तर कार्यक्रममा ओलीले आफ्नो प्रश्नको जवाफ नदिएको भन्दै आजको कार्यक्रम बहिष्कार गर्ने साहले बताए । 

बिहीवार बसेको प्रतिनिधि सभा बैठकको आकस्मिक समयमा सांसद साहले प्रश्नको जवाफ नदिने प्रश्नोत्तर कार्यक्रम संसद्को कार्यसूचीबाट हटाउन माग गरे । 

‘मन्दिरमा मूर्ति छैन भने त्यो मन्दिरको के काम ? यदि मूर्तिमा देवताको आत्म छैन भने त्यो मूर्तिको पनि काम हुँदैन,’ साहले भने, ‘सांसदले सोधेका प्रश्नलाई प्रधानमन्त्रीले जवाफ दिन नपर्ने भनेपछि यो कार्यक्रमको के काम ?’ 

यसअघि गत फागुन ६ गतेको बैठकमा प्रश्नोत्तरका क्रममा साहले सोधेको प्रश्नको ओलीले जवाफ दिन अस्वीकार गरेका थिए ।