नेपाल विद्युत प्राधिकरणबाट कार्यकारी निर्देशक कुलमान घिसिङलाई बर्खास्त गरिएको विरोधमा प्रमुख प्रतिपक्षी नेकपा (माओवादी केन्द्र)लगायत विपक्षी दलले प्रतिनिधि सभाको बैठक अवरुद्ध गरेका छन् । 

विपक्षी दलले कुलमानलाई हटाएकोबारे सरकारको जवाफ नआएसम्म सदनचल्न नदिने अडान राखेका छन् ।

बुधवार बसेको प्रतिनिधि सभा बैठकको आकस्मिक समयमा माओवादी केन्द्रका उपमहासचिवसमेत रहेका शक्तिबहादुर बस्नेतले चार महिनापछि अवकासमा जान लागेका कर्मचारीलाई किन हटाइयो भनेर प्रश्न गरे । उनले यसविषयमा सरकारले जवाफ दिनुपर्ने बताए । 

‘सरकारले स्वार्थ समूहका कारण एउटा राष्ट्रसेवकलाई मानमर्दन गरेको छ । सार्वजनिक संस्थालाई तेजोवध गर्न लागिपरेको छ,’ बस्नेतले भने ।  

बस्नेत बोलेपछि विपक्षी दलका सांसद उठेर विरोध जनाएका छन् । विपक्षी सांसदले उठेर विरोध जनाएपछि सभामुख देवराज घिमिरेले बस्न पटक पटक आग्रह गरेका छन् ।