०७ साउन २०८३, बिहीबार
ओरालोमा ब्रेक फेल भएर अर्घाखाँचीको शीतगंगा नगरपालिका–२ भुवनपाटामा बुधबार भएको बस दुर्घटनामा मृत्यु हुनेको संख्या चार पुगेको छ ।
अर्घाखाँचीबाट पश्चिम नवलपरासीतर्फ जाँदै गरेको लु २ ख ३०३ नम्बरको बस ओरालोमा सडकबाट तल खसेर दुर्घटना भएको थियो ।
जिल्ला प्रहरी कार्यालय अर्घाखाँचीका अनुसार गाडी दुर्घटनामा मृत्यु हुनेमा रुपन्देहीको बुटवल उपमहानगरपालिका–८ बस्ने ५५ वर्षीय जमुना बस्याल, पश्चिम नवलपरासी भूमही बस्ने अन्दाजी ४५ वर्षीया उमा न्यौपाने र ६५ वर्षीया उमाकी सासुआमा (नाम नखुलेकी) र बर्दघाटका ५० वर्षीय बस चालक मदनकुमार विक रहेका छन् ।
उनीहरूलाई प्राथमिक स्वास्थ्य केन्द्र ठाडाले मृत घोषणा गरेको प्रहरी निरीक्षक विष्णुप्रसाद पौडेलले बताए ।
दुर्घटनामा २८ जना यात्रु घाइते भएका छन् । जसमध्ये गम्भीर घाइते हुनेमा नवलपरासी बर्दघाट नगरपालिका–१२ बस्ने ३६ वर्षीय सन्तोष कँडेल, ४ वर्षीय अमर कँडेल, ३१ वर्षीय आशिष अधिकारी, २७ वर्षीया लक्ष्मी अधिकारी, ४ वर्षीया आन्दा अधिकारी, १४ वर्षीय आयान्स अधिकारीलाई बुटवल रेफर गरिएको प्रहरीले जनाएको छ ।
अन्य घाइतेको प्राथमिक स्वास्थ्य केन्द्र ठाडामा उपचार भइरहेको छ । उनीहरू सुपादेउराली मन्दिर दर्शन गरेर फर्किँदै गर्दा बस दुर्घटनामा परेको थियो ।
