काठमाडौंका प्रमुख जिल्ला अधिकारी (सीडीओ) ऋषिराम तिवारीले निजी सम्पत्ति तोडफोड र आगजनी गर्नेलाई कारबाहीको दायरमा ल्याउने बताएका छन् ।

उनले शान्तिपूर्ण प्रदर्शनका नाममा व्यक्तिगत सम्पत्ति तोडफोड र आगजनी गर्नेमाथि प्रहरीले सूक्ष्म निगरानी गरिरहेको बताए । 

राजावादी प्रदर्शनकारी निषेधित क्षेत्रमा प्रवेश गर्न खोज्दा प्रहरीले हस्तक्षेप गरेपछि दोहोरो झडपको अवस्था सिर्जना भएको हो । 

प्रहरीले शुरूमा लाठीचार्ज र अश्रुग्यास प्रहार गर्दा पनि प्रदर्शनकारी तितरबितर नभएपछि पानीको फोहोरा हानिएको थियो । 

तीनकुने क्षेत्रमा प्रदर्शनकारीले ग्लोबल आईएमई बैंक सञ्चालनमा रहेको प्रभु कम्प्लेक्सको भवनमा तोडफोड गरेका थिए । उनीहरूले भाडामा रहेको व्यक्तिगत घरमासमेत आगजनी गरेका छन् । 

प्रमुख जिल्ला अधिकारी तिवारीका अनुसार प्रदर्शनस्थलमा खटिएका सुरक्षाकर्मीलाई अवस्था हेरेर बल प्रयोग गर्न निर्देशन दिइएको छ । 

‘शुरूमा सुरक्षाकर्मी संयम नै थिए । प्रदर्शनकारीहरू नै जाइलागेपछि स्थिति नियन्त्रणमा लिन बल प्रयोग गर्नुपरेको हो । तितरबितर भएको भीडले निजी घर तोडफोड र आगजनी गरेका हुन् ।’

उनले यो अपराधमा आन्दोलनकारी मात्र नभएर आयोजकलाई समेत कारबाहीको दायरामा ल्याइने बताए । 

विवादास्पद मेडिकल व्यवसायी दुर्गा प्रसाईँले अहिलेको प्रदर्शनको नेतृत्व गरिरहेका छन् ।

उनले बिहीबार मात्रै पूर्वराजा ज्ञानेन्द्र शाहलाई भेटेर प्रदर्शनको ब्रिफिङ गरेका थिए । राप्रपाले समेत यो प्रदर्शनमा ऐक्यबद्धता जनाएको छ ।