समाजवादी मोर्चाले प्रतिगामी तत्त्वले अराजकता मच्चाएको भन्दै आपराधिक कार्य गर्ने माथि कारबाही गर्न सरकारसँग माग गरेको छ । ​

राजावादीले शुक्रबार काठमाडौंको तीनकुने र आसपास क्षेत्रमा तोडफोड, आगजनी र लुटपाटका घटना गराएकोमा आपत्ति जनाउँदै मोर्चाले यसमा संलग्नमाथि कारबाही गर्न माग गरेको हो ।

‘यो उच्छृङ्खल र अराजक कार्यको हामी घोर भर्त्सना एवं निन्दा गर्दछौं । यस कार्यमा संलग्न आपराधिक र आततायी तत्वलाई यथाशीघ्र कानूनी दायरामा ल्याइ कडाभन्दा कडा कारबाही गर्न सरकारसँग माग गर्दछौं,’ मोर्चाले विज्ञप्तिमा जारी गर्दै भनेको छ, ‘राजनीतिक दलको कार्यालय र नागरिकको जनधनको सुरक्षा गर्न हामी सरकारसँग जोडदार माग गर्दछौं ।’

यथास्थिति र प्रतिगामी षडयन्त्रकाविरुद्ध तथा गणतन्त्रको सम्वद्र्धन र राष्ट्रिय स्वाधीनताको संरक्षणका लागि समाजवादी मोर्चा नेपालद्वारा शुक्रबार काठमाडौंमा आयोजित वृहत् जनसभा पचासौं हजार जनताको सहभागिता रहेको मोर्चाले जनाएको छ । 

विशाल जनसर्मथन र सहभागिताबाट अत्तालिएका पुनरुत्थानवादी र उच्छृङ्खल प्रतिगामी तत्वहरूले अराजकता मच्चाएको मोर्चाको भनाइ छ ।

आन्दोलनकारीहरूले नेपाल कम्युनिष्ट पार्टी (एकीकृत समाजवादी)को केन्द्रीय, काठमाडौं जिल्ला कार्यालय, अध्यक्ष कमरेड माधवकुमार नेपालका भाई सरोज नेपालको निजी निवास लगायतमा तोडफोड र आगजनी भएको मोर्चाले जनाएको छ ।

निजी, सार्वजनिक सम्पति र कान्तिपुर एवं अन्नपूर्ण पोष्ट लगायतका सञ्चार गृहमा समेत तोडफोड तथा आगजनी भएको मोर्चाले जनाएको छ ।