११ साउन २०८३, सोमबार
पूर्वराजा ज्ञानेन्द्र शाहले काठमाडौं महानगरपालिकाले तोकेको जरिवानाको पत्र बुझ्न अस्वीकार गरेका छन् ।
उनले पत्र बुझ्न अस्वीकार गरेपछि महानगरको टोली निर्मल निवासबाट फर्किएको छ । जरिवानाको पत्र लिएर महानगर प्रहरी बलको टोली आइतबार बिहान साढे १० बजेतिर निर्मल निवास पुगेको थियो ।
तर, ज्ञानेन्द्र पत्र बुझ्न अस्वीकार गर्दै भित्र प्रवेश गर्न नदिएपछि टोली फर्किएको मेयर बालेन शाहको सचिवालयले जनाएको छ । अब हुलाकमार्फत् जरिवानाको पत्र पठाइने सचिवालयका ती सदस्यले बताए ।
शुक्रबारको राजावादीको हिंसात्मक प्रदर्शनपछि महानगरले ज्ञानेन्द्रलाई सात लाख ९३ हजार जरिवाना तिराउने निर्णय गरेको थियो ।
शुक्रबार उनको समर्थनमा राजावादीले काठमाडौं महानगरपालिका क्षेत्रभित्रका तीनकुने-कोटेश्वर क्षेत्रमा विध्वंस मच्चाएका थिए ।
शाहको समर्थनमा उनकै निर्देशनमा भएको प्रदर्शनले महानगरको क्षेत्राधिकारभित्रका सार्वजनिक सम्पत्तिमा तोडफोड र फोहोरमैला गरेको भन्दै मेयर बालेन शाहले शनिबार जरिवानाको निर्णय गरेका थिए । शाहमा नाममा जरिवानाका ८ वटा पत्र काटिएको थियो ।
ज्ञानेन्द्रका समर्थकले लगाएको आगो निभाउन पुगेको महानगरको दमकलमा समेत उनीहरूले तोडफोड गरेका थिए । यस्तै, आइल्यान्ड र रेलिङहरूमा समेत तोडफोड र क्षति गरेका थिए ।
समग्र क्षतिको मूल्याकंन सरकारको छानबिन समितिले गर्ने भएपनि महानगरले आफ्नो क्षेत्राधिकारभत्रिको काम गरेको मेयर बालेन शाहको सचिवालयले जनाएको छ ।
यसअघि महानगरपालिकाले शनिबार बिहान शहरी योजना आयोग, शहरी व्यवस्थापन विभाग, महानगर प्रहरी बलसहितको टोली बनाएर अध्ययन गरेको थियो । अध्ययन टोलीको प्रतिवेदनका आधारमा मेयर शाहले जरिवानाको निर्णय गरेका हुन् ।
यसअघि फागुन २५ गते ज्ञानेन्द्रको स्वागतमा सिनामंगल-गौशाला क्षेत्रमा फोहोर गरेको भन्दै महानगरले राप्रपालाई एक लाख रूपैयाँ जरिवाना तिराएको थियो । त्यतिबेलाको आयोजक राप्रपा थियो ।
