२४ जेठ २०८३, आइतबार
गृहमन्त्री रमेश लेखकले मंगलबार संसद्मा बोल्नका लागि समय मागे पनि शोक प्रस्तावका कारण उक्त कार्यक्रम स्थगित भएको छ ।
मंगलबारको प्रतिनिधिसभा बैठकमा गृहमन्त्री लेखकले समय माग गरे पनि राप्रपा सांसद दीपक बोहराको निधनका कारण त्यो कार्यक्रम स्थगित भएको हो ।
राजावादी विभिन्न संस्थाको आह्वानमा चैत १५ गते काठमाडौंको तीनकुनेमा भएको हिंसात्मक घटना सम्बन्धमा गृहमन्त्रीले बोल्नका लागि समय माग गरेका थिए । ‘माननीय गृहमन्त्रीले बोल्नका लागि समय माग्नु भएकोमा सो समेत हटाइएको व्यहोरा जानकारी गराउँछु,’ संसद्को कार्यसूची हटाइएको बारे सभामुख देवराज घिमिरेले भने ।
तीनकुनेमा भएको घटनाबारे सोमबार प्रधानमन्त्री केपी शर्मा ओलीले पूर्वराजा ज्ञानेन्द्र शाहको उक्साहटमा तीनकुने घटना भएको बताएका थिए ।
घटनाको भोलिपल्ट स्थलगत अवलोकन गरेका गृहमन्त्रीले क्षतिबारे विस्तृतमा संसद्लाई जानकारी गराउन खोजेका थिए ।
बहालवाला सांसदको मृत्यु भइ शोक प्रस्ताव पारित गर्ने दिन संसद्का अन्य कार्यक्रम हटाउने संसदीय प्रचलन छ ।
