नेपाली कांग्रेसका केन्द्रीय सदस्य बालकृष्ण खाणले राप्रपा नेता दिवंगत दीपक बोहोराप्रति श्रद्धाञ्जली व्यक्त गरेका छन् ।

२०७९ को प्रतिनिधिसभा निर्वाचनमा सँगै प्रतिस्पर्धा गरेका सांसद बोहोराको मंगलबार निधन भएपछि खाणले श्रद्धाञ्जली अर्पण गरेका हुन् । बोहोराको निधनबाट आफू स्तब्ध भएको खाणले उल्लेख गरेका छन ।

‘मृत आत्माको चीर शान्तिको कामना गर्दै शोक सन्तप्त परिवारजनप्रति गहिरो समवेदना प्रकट गर्दछु’, खाणले विज्ञप्ति जारी गर्दै भनेका छन् । 

गत निर्वाचनमा उनीहरूले रूपन्देही- ३ मा प्रतिस्पर्धा गरेका थिए । बोहोराले खाणलाई पराजित गरेका थिए ।  एमालेसँग तालमेल गरेका बोहरा २६८१ मतान्तरले विजयी भएका थिए ।

उनले ३६ हजार ७१७ मत प्राप्त गर्दा बहालवाला गृहमन्त्री खाणले ३४ हजार ३६ मत प्राप्त गरेका थिए । 

पूर्वमन्त्रीसमेत रहेका ७६ वर्षीय बोहोराको उपचारका क्रममा मंगलबार बिहान काठमाडौंको ओम अस्पतालमा निधन भएको हो । उनको मृत्यु भएसँगै प्रतिनिधिसभामा रूपन्देही-३ को प्रतिनिधित्व रिक्त भएको  छ । 

प्रतिनिधिसभाको अवधि ६ महिना बाँकी रहँदासम्म मृत्यु वा अन्य कुनै कारणले सदस्य रिक्त भए उपनिर्वाचन गर्नुपर्ने प्रावधान निर्वाचन कानूनमा उल्लेख ।