३१ जेठ २०८३, आइतबार
निर्माणाधीन बुटवल-नारायणगढ सडकको दाउन्ने खण्ड वर्षाका कारण अवरुद्ध भएको छ । सडक हिलाम्य भएसँगै यातायात अवरुद्ध भएको हो ।
वर्षाले बाटो अवरुद्ध हुँदा हजारौँ यात्रु बाटोमा अलपत्र परेका छन् । इलाका प्रहरी कार्यालय, दुम्कीबासले हिलोले गर्दा उकालोमा गाडी चल्न नसक्दा दिनभर समस्या भएको बताए ।
‘पानी परेर दाउन्ने मन्दिर नजिकै पुगेको गाडी वान वे मा फसेपछि अहिले बाटो अवरुद्ध छ’ एक प्रहरी अधिकृतले भने, ‘भर्खर गाडी निकाल्न क्रेन गएको छ । क्रेनले गाडी निकाल्ने र हिलाम्य ठाउँमा बाटो बनाएर खुलाउने प्रयास अघि बढेको छ ।’
दाउन्ने खण्डमा बाटो छिटो निर्माणका लागि भनेर बिहीबारदेखि लागू हुने गरी बिहान ११ बजेदेखि ३ बजेसम्म बन्द हुने र आउँदो नयाँ वर्ष २०८२ वैशाख १ गतेदेखि राति ११ देखि ५ बजेसम्म सडक बन्द गरेर काम गर्ने बुटवल नारायणगढ सडक विस्तार आयोजनाले जनाएको छ । विगत लामो समयदेखि दाउन्ने खण्डमा सडक जाम हुँदा दैनिकजसो यात्रुले दश घण्टासम्म ट्राफिक जामको सास्ती खेप्दै आएका छन् ।
इलाका प्रहरी कार्यालय, बर्दघाटका इन्स्पेक्टर दीपेन्द्र बानियाले दाउन्ने मन्दिरदेखि दुम्कीबास खण्डमा समस्या रहेको बताए ।
