अख्तियार दुरुपयोग अनुसन्धान आयोगले विशेष अदालतबाट सफाइ पाएका दुई वटा भ्रष्टाचार मुद्दामा चित्त नबुझी सर्वोच्च अदालतमा पुनरावेदन गरेको छ ।

चितवन राष्ट्रिय निकुञ्जको कोर क्षेत्रमा बिनाअनुमति ठूला कंक्रिट संरचना निर्माण गरी वातावरण र वन्यजन्तुलाई हानी पुर्‍याएको आरोपमा तत्कालीन सहायक संरक्षण अधिकृत अभिनय पाठकसहितका विरुद्ध दायर गरिएको थियो । तर, यो मुद्दामा विशेषले गत असार १८ गते सफाइ दिएपछि आयोग पुनरावेदनका लागि सर्वोच्च पुगेको हो । 

आयोगले सो संरचनाका लागि निकुञ्जको नियमविपरीत खैरहनी नगरपालिका र सामुदायिक वन उपभोक्ता समूहको रकम दुरुपयोग गरिएको दाबी गर्दै ३१ लाख ५९ हजार ७३५ रूपैयाँ बिगो कायम गरेर मुद्दा दायर गरेको थियो । 

यसैगरी, रुपन्देहीस्थित नापी कार्यालयका अधिकृत र सर्भेक्षकसँग मुद्दामा पनि आयोगले सर्वोच्चमा पुनरावेदन गरेको छ । 

नापी अधिकृत ध्रुवराज मरासिनी, बिन्देश्वर यादव र सर्भेक्षक ठाकुरप्रसाद गुरौविरुद्ध दायर उक्त मुद्दामा १० लाख ६५ हजार २०५ रूपैयाँभन्दा बढी बिगो कायम गरिएको थियो ।

उनीहरूले साविक दुधराक्ष गाविस–७ क मा सार्वजनिक कुलोको जमिन नियम विपरीत व्यक्तिको नाममा पास गरिदिएको आयोगको आरोप छ । 

आयोगले उनीहरूलाई कैद, जरिवाना र सार्वजनिक जग्गा जफत गर्न माग गर्दै भ्रष्टाचार निवारण ऐनअनुसार विशेष अदालतमा मुद्दा दायर गरेको थियो।  तर विशेष अदालतले २०८० फागुन १७ मा सफाइ दिएको थियो । आयोगले सो फैसलाविरुद्ध पनि आइतबार नै सर्वोच्च पुनरावेदन गरेको प्रवक्ता राजेन्द्र कुमार पौडेलले जानकारी दिए । 

प्रवक्ता पौडेलले दुवै मुद्दामा प्रमाण पर्याप्त रहेको भन्दै विशेषको फैसला पुनरवलोकनका लागि सर्वोच्चमा पुनरावेदन गरिएको हो।