२० असार २०८३, शनिबार
सिकार खेल्ने क्रममा भरुवा बन्दुकको गोली लागेर एक युवकको मृत्यु भएपछि प्रहरीले तीन जनालाई पक्राउ गरेको छ।
मृत्यु हुनेमा कपिलवस्तुको बुद्धभूमि नगरपालिका–९ गब्दहवाका २८ वर्षीय समुन्द्र गाहा मगर रहेका छन् ।
समुन्द्र, ३४ वर्षीय रामबहादुर थारु र कालु भन्ने ३६ वर्षीय राम थारु शनिबार दिउँसो जंगलमा सिकार खेल्न गएका थिए । बुद्धभूमि–९ स्थित गब्दहवा र खैरभट्टीको सिमानामा रहेको बुद्ध यशोधरा सामुदायिक वनमा सिकार खेल्न गएकामा रामबहादुरको बन्दुक पड्किएर समुन्द्रलाई गोली लागेको खुलेको छ ।
घटनापछि घाइते गाहा मगरलाई उनीहरूले कसैलाई जानकारी नदिई भैरहवा मेडिकल कलेज पुर्याएको प्रहरीको भनाइ छ । अस्पताल पुर्याएलगत्तै चिकित्सकले उनलाई मृत घोषणा गरेका थिए ।
प्रहरीले आइतबार रामबहादुर, राम र प्रवेश थारुलाई पक्राउ गरेको छ । प्रवेशले हतियार लुकाउन सहयोग गरेको जिल्ला प्रहरी कार्यालयका कपिलवस्तुका सूचना अधिकारी, डीएसपी मोहन मणि अधिकारीले जानकारी दिए ।
उनका अनुसार घटनामा प्रयोग भएका दुई नाल भरुवा बन्दुकमध्ये एउटा पड्किएको र अर्को लोडेड अवस्थामा लुकाइ राखिएको बरामद भएको छ ।
पक्राउ परेका तीनै जनालाई बरामद हतियारसहित इलाका प्रहरी कार्यालय गोरुसिङ्गेमा ल्याएर थप अनुसन्धान भइरहेको डीएसपी अधिकारीले जानकारी दिए ।
