‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सरकारले नेपाल प्रहरीका ६ जना नायब महानिरीक्षक (डीआईजी)लाई प्रहरी अतिरिक्त महानिरीक्षक (एआईजी)मा बढुवा सिफारिस गरेको छ । 
बढुवा समितिको बैठकले ६ जना डीआईजीहरू क्रमशः चन्द्र कुबेर खापुङ, लालमणि आचार्य, कृष्णहरी शर्मा पोखरेल, दानबहादुर कार्की, राजन अधिकारी र डा। मनोज केसीलाई एआईजीमा बढुवा गर्न सिफारिस गरेको हो । 
००००
उच्च अदालत जनकपुरले यौन सन्तुष्टि प्राप्त गर्ने तथा बाल यौन शोषण मुद्दामा रामबहादुर (रामलाल) बम्जनलाई सफाइ दिएको छ ।
न्यायाधीशद्वय नरिश्वर भण्डारी र  खेमराज भट्टको संयुक्त इजलासले सर्लाही जिल्ला अदालतको फैसला बदर गर्दै बम्जनलाई सफाइ दिएको हो ।
००००
प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई पनि माथ दिनेगरी पार्टीभित्रै सरकारका विषयमा प्रश्न उठेपछि कांग्रेस सभापति शेरबहादुर देउवाले अर्थपूर्ण खुलासा गरेका छन् । 
एमालेसँगको ७ बुँदे सहमतिपछि प्रधानमन्त्रीमा देउवा आफ्नो पालो पर्खेर बसेका छन् । तर, एमाले अध्यक्ष केपी शर्मा ओलीको पालो अझै १४ महिना बाँकी हुँदा समीकरणमाथि नै प्रश्न उठ्न थालेपछि देउवाले बिहीबार बसेको पदाधिकारी र पूर्वपदाधिकारीको बैठकमा अर्थपूर्ण खुलासा गरेका हुन् ।
संयुक्त सरकारको डेलिभरी, सन्तुलन र समन्वयमा पेचिलो हुने गरी प्रश्न उठेपछि देउवाले प्रधानमन्त्रीसँग कांग्रेसले पर्याप्त छलफल गरेको प्रस्ट्याएका हुन् । सरकारलाई निरन्तरता दिनेगरी प्रभावकारी समन्वय, उपयुक्त नियुक्ति र सन्तुलनका लागि प्रधानमन्त्री ओलीसँग छलफल भएको भन्दै देउवाले सरकारबारे अनावश्यक टिप्पणी नगर्न नेताहरूलाई निर्देशन दिएका थिए । 
पार्टीका प्रमुख सचेतक समेत रहेका श्याम घिमिरेले ‘सरकारलाई हेर्ने दृष्टिकोणमा पक्ष र विपक्षमा कुरा आएको छ, हामी कता उभिने ?’ भन्दै गम्भीर प्रश्न उठाएका थिए ।
उनले प्रश्न गरिनसक्दै देउवाले– ‘कता उभिने भन्नेमा दायाँबायाँको कुरा नै छैन, सरकारको पक्षमा उभिने हो । असन्तुष्टि भए पार्टीभित्र राख्नुस्, यी कुरा म प्रधानमन्त्रीसमक्ष राख्छु, राखिरहेको छु,’ भनेका थिए । 
प्रधानमन्त्रीसँग निरन्तर कुरा भइरहँदा बाहिर अनावश्यकरूपमा नेताहरूले बोलेकोप्रति देउवाले असन्तुष्टि राखेको एक नेताले जानकारी दिए ।
००००
राष्ट्रिय स्वतन्त्र पार्टी (रास्वपा)ले देशका सात वटै प्रदेशमा इन्चार्ज तोकेको छ । 
बिहीबार बसेको केन्द्रीय समिति बैठकले सबै प्रदेशमा इन्चार्ज तोकेको कार्यवाहक प्रवक्ता मनिष झाले जानकारी दिए । 
सात प्रदेशमध्ये रास्वपाले एक प्रदेशमा मात्र महिला इन्चार्ज खटाएको छ । हालै सहमहामन्त्रीबाट राजीनामा दिएकी सुमना श्रेष्ठ भने अटाएकी छैनन् । 
रास्वपाको महाधिवेशन १० महिना पछि सरेको छ । यसअघि यही वैशाखमा गर्ने भनेर तय गरिएको महाधिवेशन अब फागुनमा हुने भएको छ ।
००००
पूर्व अर्थमन्त्रीहरुले कार्यान्वयन योग्य र यथार्थपरक बजेट ल्याउन सुझाव दिएका छन् । 
बिहीबार अर्थ मन्त्रालयले आयोजना गरेको आर्थिक वर्ष २०८२–०८३ वर्षको बजेट सम्बन्धी परामर्शमा पूर्व अर्थमन्त्रीहरुले लोकप्रिय र नारामा केन्द्रित नभइ व्यवहारिक बजेट ल्याउन सुझाव दिएका हुन्। त्यसैगरी उनीहरुले  बजेटलाई उत्पादन र रोजगारीमा केन्द्रित गर्न पनि सुझाव दिए ।  
००००
जिल्ला प्रशासन कार्यालय पर्साले वीरगञ्ज महानगर क्षेत्रमा लगाएको निषेधाज्ञा शुक्रबार बिहानदेखि हटाएको छ ।          
प्रमुख जिल्ला अधिकारी गणेश अर्यालको अध्यक्षतामा बिहीबार बसेको जिल्ला सुरक्षा समितिको बैठकले वीरगञ्जको शान्तिसुरक्षाको स्थिति सामान्य भएकाले आज बिहान ७ बजेदेखि निषेधाज्ञा हटाउने निर्णय गरेको हो ।  
००००
सुनसरीको धरानस्थित जंगलमा गत सोमबार अर्धनग्न अवस्थामा मृत भेटिएकी एक महिलाको हत्यामा उनकै श्रीमानको संलग्नता रहेको प्रहरी अनुसन्धानबाट खुलेको छ ।
धनकुटाको महालक्ष्मी नगरपालिका–२ की ३४ वर्षीया चुनकुमारी दाहाल बुढाथोकीको हत्या उनकै श्रीमानले गरेको प्रहरीको अनुसन्धानबाट खुलेको हो ।  
००००
जारी भएको दुई दशकसम्म पनि आधिकारिक कार्यान्वयनमा जान नसकेको आयोडिनयुक्त नुन उत्पादन तथा बिक्री वितरण ऐन २०५५ कार्यान्वयनमा आएको छ ।
स्वास्थ्य तथा जनसंख्या मन्त्री प्रदीप पौडेलले लगेको प्रस्ताव वैशाख २ गतेको मन्त्रिपरिषद् बैठकबाट पारित भएसँगै बल्ल ऐन कार्यान्वयनमा गएको हो ।
००००
नेकपा (माओवादी केन्द्र)का अध्यक्ष पुष्पकमल दाहाल प्रचण्डले गभर्नर नियुक्तिमा बिचौलियाबीच  तानातान चलिरहेको आरोप लगाएका छन् । प्रेस सेन्टर रुपन्देहीले बिहीबार भैरहवामा आयोजना गरेको पत्रकार भेटघाटमा प्रचण्डले गभर्नर नियुक्तिमा कांग्रेस र एमालेबीच नभई बिचौलियाबीच तानातान चलिरहेको आरोप लगाएका हुन् ।