१८ असार २०८३, बिहीबार
अख्तियार दुरुपयोग अनुसन्धान आयोगले कास्कीको पोखरा महानगरपालिका एक अधिकृतविरुद्ध भ्रष्टाचार मुद्दा दायर गरेको छ ।
घुस/रिसवत लिई भ्रष्टाचार गरेको आरोपमा महानगरको उजुरी फर्छ्यौट तथा समन्वय शाखामा कार्यरत अधिकृत कपिल गिरीविरुद्ध मंगलबार विशेष अदालत काठमाडौंमा मुद्दा दायर गरिएको आयोगका प्रवक्ता राजेन्द्रकुमार पौडेलले जानकारी दिए ।
उनका अनुसार गिरीले उजुरीसँग सम्बन्धित प्रमाण मेटाइदिने भन्दै सेवाग्राहीसँग २५ हजार रुपैयाँ घुस लिएका थिए ।
गिरीले उजुरीसँग सम्बन्धित प्रमाण मेटाई फरफारक गर्ने भन्दै सेवाग्राहीसँग घुस लिएको पुष्टि भएपछि उनीविरुद्ध आरोपपत्र दायर गरिएको हो ।
आयोगले भ्रष्टाचार निवारण ऐन, २०५९ अनुसार उनलाई कैद र जरिवाना दुवै सजायको मागदाबी गरेको छ ।
