जनमत पार्टीका अध्यक्ष डा. सीके राउतको सम्बन्धविच्छेद मुद्दा मिलापत्रमा टुंगिएको छ । 

ललितपुर जिल्ला अदालतकी न्यायाधीश निर्मला योङ्‍याको इजलासले वैवाहिक नाता कायम रहने गरी बुधबार मिलापत्रमा मुद्दाको टुंगो लगाइदिएको हो ।

प्रतिनिधि सभाका सांसद समेत रहेका राउतले पत्नी सोनी सिन्धु रानीसँग सम्बन्धविच्छेद गरिपाऊँ भनी गत भदौमा निवेदन दिएका थिए । तर, अदालतले सम्बन्धविच्छेद नगरी अलग–अलग रहन अनुमति दिएको हो ।

अदालतका सूचना अधिकारी रामसजिवन महतोका अनुसार मिलापत्रको आदेशमा राउतले पत्नी सिन्धुलाई आजीवन मासिक ३३ हजार रुपैया दिनुपर्ने उल्लेख छ ।

महंगीको आधारमा यो रकम बर्सेनि १० प्रतिशतका दरले बढ्ने छ । यस्तै, राउतले पत्नीलाई अंशबापत काठमाडौं उपत्यकामा दिएको जग्गामा घर बनाइदिनुपर्नेछ । राउतको भागमा पर्ने पैत्रिक सम्पत्तिलाई ५ भाग (छोराछोरीसहित) लगाएर एक हिस्सा पत्नीलाई दिने मिलापत्रमा उल्लेख छ । 

मिलापत्रबमोजिम ३ सन्तानको जिम्मा सीकेले लिनेछन् । बच्चाको भागमा परेको सम्पत्ति पनि सीकेकै नाममा रहनेछ । सीकेले भविष्यमा आर्जन गर्ने सम्पत्तिमा पत्नीको हक नलाग्ने भएको छ । छोराछोरी भने हकवाला कायम रहनेछन् ।

दुवैले सार्वजनिकरूपमा एकअर्काको आलोचना नगर्ने पनि मिलापत्रमा उल्लेख गरिएको छ । 'मधेश स्वराज’को नारा लगाएर उदाएका सीकेले पत्नीमाथि दुर्व्यवहार गरेको भन्दै उनको आलोचना भएको थियो । 

सम्बन्धविच्छेदको मुद्दा मिलापत्रमा टुंगिएलगत्तै राउतले बुधबार सामाजिक सञ्जाल फेसबूकमा पत्नीसहितको तस्वीर राखेका छन् । 

पढ्नुहोस्, यो पनि :

सीके राउतको फिराद पत्र : श्रीमतीमाथि गम्भीर आरोप, ५ भागको १ भाग सम्पत्ति मात्र दिन माग

सीके राउतको पार्टीमा भाँडभैलो– 'श्रीमती र सम्पत्ति'को विषयलाई लिएर हातहातमा स्पष्टीकरण