२२ असार २०८३, सोमबार
धनुषाको शहीद नगरपालिका– ५ यदुकोहामा विष सेवनबाट गत सोमबार तीन बालबालिकाको मृत्युको घटनामा आमाको पनि चार दिनपछि निधन भएको छ ।
विष सेवनबाट गम्भीर भएकी आमा पवित्रा साहको जनकपुरधामस्थित रामजानकी अस्पतालमा आज मृत्यु भएको जिल्ला प्रहरी कार्यालयले जनाएको छ ।
गत सोमबार गहुँमा राख्ने विषादी सेवनबाट आमा बिरामी र तीन छोराछोरीको मृत्यु भएको थियो ।
तीन छोराछोरी छ वर्षीय आदित्य साह, चार वर्षीया आकृति साह र दुई वर्षीया छोरी आरुती साहको घटनास्थलमै मृत्यु भएको थियो ।
विष सेवन गरेकी आमा पवित्रा साहको अवस्था गम्भीर भएपछि भेन्टिलेटरमा राखेर अस्पतालमा उपचार भइरहेको थियो ।
गर्भवती पवित्राको शल्यक्रिया गरेर शिशु निकालिएको थियो । शिशुको अवस्था सामान्य रहेको अस्पतालका सञ्चालक मिथलेश साहले जानकारी दिए ।
पारिवारिक विवादका कारण घटना भएको प्रहरीको अनुमान रहेको छ । घटनाको थप अनुसन्धान भइरहेको प्रहरीले जनाएको छ ।
