२८ जेठ २०८३, बिहीबार
‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
तीनकुनेमा राजावादी समूहले गरेको प्रदर्शन भड्काउन भूमिका खेलेको आरोप लागेका राप्रपाका महामन्त्री धवलशमशेर राणा फेरि सक्रिय भएका छन् । क्यान्सरको उपचारका लागि रिहा भएका उनी लगत्तै राजावादी आन्दोलनमा सक्रिय भएका हुन् ।
उनले विचार स्वतन्त्रतामा बन्देज लगाउने सरकारको दुष्प्रयासको विरोध र आस्थाका बन्दीको रिहाइको माग गर्न सोमबार जनप्रदर्शनमा सहभागी हुन सबै प्रजातन्त्रवादी, राष्ट्रवादीलाई आह्वान गरेका छन् । राजावादी समूहले सोमबार राजधानीमा प्रदर्शन गर्दैछन् ।
००००
काठमाडौँ जिल्ला अदालतले राप्रपाका उपाध्यक्ष रवीन्द्र मिश्रसहित तीनकुने घटनामा पक्राउ परेका केही व्यक्तिहरूको स्वास्थ्य उपचारमा प्राथमिकता दिन आदेश गरेको छ ।
चैत १५ गते राजावादी समूहले गरेको प्रदर्शनलाई भड्काएको आरोपमा पक्राउ परेकाहरूलाई म्याद थपका लागि उपस्थित गराइँदा अदालतले आइतबार मिश्रसहित पशुपति खड्का र दुर्गा प्रसाईंसमेतको स्वास्थ्य उपचार प्राथमिकता दिन आदेश दिएको अदालतका सूचना अधिकारी दीपककुमार श्रेष्ठले जानकारी दिए ।
यद्यपि अदालतले उनीहरूलाई थप ७ दिन हिरासतमा राख्न भने अनुमति दिएको छ । अदालतले कुल २५ जनालाई थप ७ दिन हिरासतमा राख्न अनुमति दिएको हो ।
अदालतमा रवीन्द्र मिश्रले न्यायाधीशसमक्ष आमाको मुख हेर्न दिन आग्रह गरेका थिए । मिश्रले रिहाइका लागि अदालतमा भनेपनि म्याद थप नै भएको हो ।
००००
मधेस प्रदेशको सामाजिक विकास मन्त्रालयका तत्कालीन सचिव इम नारायण श्रेष्ठलगायतविरुद्ध ५२ करोड भन्दा बढीको भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले आइतबार छुट्टाछुट्टै ४ वटा भ्रष्टाचार मुद्दा दायर गर्दै ५२ करोड ४२ लाख ५४ हजार ४६० रुपैयाँ बिगो मागदाबी गरेको हो ।
००००
नेपाल विद्युत् प्राधिकरणले विद्युत् आपूर्तिसम्बन्धी सामाजिक सञ्जालमा फैलिएको भ्रमप्रति गम्भीर ध्यानाकर्षण भएको जनाएको छ ।
प्राधिकरणले आइतबार एक विज्ञप्ति जारी गरी विद्युत् आपूर्तिमा कुनै समस्या नरहेकाले ‘लोडसेडिङ’ को सम्भावना नरहेको स्पष्ट पारेको हो ।
००००
काठमाडौंको नयाँ बानेश्वरमा आन्दोलन गरिरहेका शिक्षकले निषेधित क्षेत्र तोड्न खोजेपछि भएको झडपमा शिक्षक, पत्रकार र प्रहरीसहित २६ जना घाइते भएका छन् ।
विगत २६ दिनदेखि आन्दोलन गरिरहेका शिक्षकले आइतबार निषेधित क्षेत्र तोड्न खोजेपछि रोक्न खोज्दा उक्त झडप भएको हो ।
सो क्रममा ५ प्रहरी, एक पत्रकार र २० शिक्षक घाइते भएका जिल्ला प्रहरी परिसर काठमाडौंका प्रवक्ता, प्रहरी उपरीक्षक अपिलराज बोहराले जानकारी दिए ।
घाइतेको काठमाडौंका विभिन्न अस्पतालमा उपचार भइरहेको छ ।
००००
नेकपा माओवादी केन्द्रका अध्यक्ष पुष्पकमल दाहाल ुप्रचण्डुले जनताको पक्षमा फेरि अर्को क्रान्ति गरेर माथि (स्वर्ग ?) जाने भनेर आफू दौडिरहेको बताएका छन् । ७० वर्षको उमेरमा पनि आफू तन्नेरी जस्तो बनेर देश दौडाहामा हिँडेको उनले बताए ।
बाँकेको राप्तीसोनारी गाउँपालिकामा आइतबार आयोजित जनसभा कार्यक्रममा प्रचण्डले समाजवादी क्रान्तिको झण्डा गाडेर मात्र माथि जाने योजना रहेको बताएका हुन् ।
००००
प्रधानमन्त्री एवं नेपाल कम्युनिस्ट पार्टी एमालेका अध्यक्ष केपी शर्मा ओलीले आफ्नो बेडरुमसम्म बिचौलियाको पहुँच छ भनेर लाञ्छित गर्नेहरूलाई आरोप प्रमाणित गर्न चुनौती दिएका छन् ।
मदन भण्डारी फाउण्डेशनको चौथो राष्ट्रिय सम्मेलनको आइतबार उद्घाटन गर्दै प्रधानमन्त्री ओलीले राजनीतिमा छिर्के दाउ हाल्ने, षड्यन्त्र गर्ने र झेली खेलाडीले लाज(सरम पचाएर आरोप लगाएका बताए ।
००००
पर्साको सानो पाइला सहकारी ठगीको अनुसन्धान मिसिल जिल्ला सरकारी वकिल कार्यालयमा पुगेको छ ।
जिल्ला प्रहरी कार्यालय पर्साले अनुसन्धान सकाएर शुक्रबार मिसिल सरकारी वकिलको कार्यालयमा बुझाएको हो ।
००००
नेकपा एमालेका सांसद ठाकुर गैरेले संविधानको धज्जी उडाउँदै पूर्वराजा ज्ञानेन्द्र शाहले ‘श्री ५ महाराजाधिराज’को नाममा समवेदना सन्देश जारी गरेको भन्दै कारवाहीको माग गरेका छन् ।
पूर्वराजा ज्ञानेन्द्रको संवाद सचिवालयका नाममा शनिबार जारी गरिएको समवेदना वक्तव्यमा श्री ५ महाराजधिराज लेखिएको भन्दै उनले आपत्ति जनाएका हुन् । साहले काश्मीरमा भएको आतंककारी हमलाको विरोध गर्दै शनिबार शोक वक्तव्य जारी गरेका थिए ।
००००
साताको पहिलो कारोबारका दिन नेपाल स्टक एक्सचेन्ज झिनो अङ्कले बढेको छ ।
आइतबार नेप्से परिसूचक ३.५८ अङ्कले बढेर २६६१.६० को विन्दुमा कायम भएको हो ।
