अमेरिकी राष्ट्रपति डोनाल्ड ट्रम्पले दोस्रो कार्यकाल शुरू गरेको १०० दिन नपुग्दै उनीप्रति अमेरिकी जनताको समर्थनमा तीव्र गिरावट आएको देखिएको छ । ​​

सीएनएन र एसएसआरएसले संयुक्तरूपमा गरेको नयाँ सर्वेक्षणले ट्रम्पप्रति जनमत नकारात्मक हुँदै गएको देखाएको हो ।

सर्वेक्षणअनुसार, ट्रम्पको समर्थन दर हाल ४१ प्रतिशतमा झरेको छ, जुन १०० दिनमा कुनै पनि नवनिर्वाचित अमेरिकी राष्ट्रपतिमध्ये सबैभन्दा न्यून समर्थन दर हो ।

ट्रम्पको पहिलो कार्यकालको तुलनामा समेत यो दर कम रहेको छ । 

मार्चयता मात्रै ट्रम्पप्रतिको समर्थन ४ प्रतिशतले घटेको छ भने फेब्रुअरीको अन्त्यदेखि ७ प्रतिशतले घटेको सीएनएनले जनाएको छ । अहिले जम्मा २२ प्रतिशतले मात्रै ट्रम्पको कामप्रति बलियो समर्थन जनाएका छन् । ४५ प्रतिशतले बलियो असन्तुष्टि व्यक्त गरेका छन् ।

विशेषगरी महिला समुदायमा ट्रम्पको समर्थन उल्लेखनीय रूपमा घटेको छ । महिलामाझ समर्थन ७ प्रतिशतले घटेर ३६ प्रतिशत कायम भएको छ ।

रिपब्लिकनहरूमध्ये अझै ८६ प्रतिशतले ट्रम्पलाई समर्थन गरेका छन् भने डेमोक्र्याटहरूमा ९३ प्रतिशतले असन्तुष्टि जनाएका छन् । स्वतन्त्र मतदाताबीच ट्रम्पको समर्थन ३१ प्रतिशतमा सीमित छ, जुन उनको पहिलो कार्यकालको सबैभन्दा तल्लो स्तरसँग मिल्दोजुल्दो छ ।

सर्वेक्षणले ट्रम्पले प्रमुख नीतिगत मुद्दामा जनताको विश्वास गुमाउँदै गइरहेको देखाएको सीएनएनले उल्लेख गरेको छ । आर्थिक मामिलामा पनि ट्रम्पको प्रदर्शनप्रति जनसमर्थन घटेको छ ।

मुद्रास्फीतिको मुद्दामा उनको समर्थन दर ९ अंकले घटेर ३५ प्रतिशतमा पुगेको छ भने भन्सार महसुलका विषयमा ४ अंकले घटेर ३५ प्रतिशतमा सीमित भएको छ । समग्रमा अर्थतन्त्रको व्यवस्थापनमा उनको समर्थन ५ अंकले घटेर ३९ प्रतिशतमा झरेको छ ।

संघीय सरकारको व्यवस्थापन र योग्य व्यक्तिहरूको नियुक्तिको मामिलामा पनि ट्रम्पको विश्वासयोग्यता घटेको छ ।

संघीय सरकारको व्यवस्थापनमा समर्थन ६ अंकले घटेको छ भने उपयुक्त व्यक्तिहरूलाई नियुक्त गर्ने क्षमतामा विश्वास गर्नेहरूको संख्या ८ अंकले घटेर ४६ प्रतिशतमा सीमित भएको छ ।

विदेश नीति र आप्रवासनजस्ता मुद्दामा पनि ट्रम्पप्रति जनआस्था कमजोर हुँदै गएको छ ।

युक्रेन युद्धमा रुसप्रति नरम व्यवहार र वैदेशिक सहायता कार्यक्रमहरू कटौतीजस्ता निर्णयहरूले गर्दा परराष्ट्र मामिलामा उनको समर्थन ३९ प्रतिशतमा झरेको छ । आप्रवासन नीतिमा पनि समर्थन ६ अंकले घटेर ४५ प्रतिशतमा पुगेको छ ।

तर, यौन पहिचान र ट्रान्सजेन्डरसम्बन्धी मुद्दामा भने ट्रम्पले सानो सफलता हात पारेका छन् । यस क्षेत्रमा उनको समर्थन दर ५१ प्रतिशत रहेको छ, जसमा रिपब्लिकन समर्थकहरूबीच अत्यधिक समर्थन देखिएको छ ।

ट्रम्पका केही विवादास्पद कदमहरू– जस्तै राष्ट्रिय सांस्कृतिक संस्थाहरूमा हस्तक्षेप गर्ने प्रयासलाई जनताले अस्वीकृत गरेका छन् । करिब ६४ प्रतिशतले ट्रम्पको यस्तो प्रयास अनुचित भएको ठानेका छन् ।

रिपब्लिकन उपराष्ट्रपति जेडी भ्यान्सको लोकप्रियता पनि ट्रम्पजस्तै कमजोर देखिएको छ । भ्यान्सको समर्थन दर पनि ४१ प्रतिशतमा सीमित छ ।

कुल मिलाएर हेर्दा अमेरिकीहरू ट्रम्पको नेतृत्वप्रति सशंकित बन्दै गएको देखिएको छ । राष्ट्रपतिका रूपमा शक्तिको जिम्मेवार प्रयोगमा विश्वास गर्नेहरूको संख्या ८ प्रतिशतले घटेको छ भने देशलाई नेतृत्व दिन सक्ने विश्वास ९ प्रतिशतले घटेको छ ।

कार्यकारी आदेशहरूको अत्यधिक प्रयोगका कारण ट्रम्प आलोचित भएका छन्, जसमा धेरै आदेशले अदालतमा चुनौती खेपिरहेका छन् ।

यद्यपि, केही समर्थकहरू अझै पनि ट्रम्पले आफ्नो चुनावी प्रतिबद्धता पूरा गरिरहेको विश्वास गर्छन् । सर्वेक्षण अनुसार ५२ प्रतिशत अमेरिकीले ट्रम्पको दोस्रो कार्यकालले देशमा गहिरो परिवर्तन ल्याउने विश्वास व्यक्त गरेका छन् ।

सर्वेक्षण अप्रिल १७ देखि २४ सम्म १,६७८ जना अमेरिकी वयस्कबीच गरिएको थियो र यसमा त्रुटि सीमा ±२.९ प्रतिशत रहेको सीएनएनले लेखेको छ ।