सर्वोच्च अदालतले नागरिक उन्मुक्ति पार्टीका संरक्षक रेशम चौधरीलाई कारागार पठाउन भनेर पत्र लेख्ने कर्मचारीलाई कारबाही गर्न प्रहरीलाई पत्राचार गरेको छ ।

सर्वोच्च अदालतको मुद्दा तथा रिट महाशाखाका शाखा अधिकृत महिनामासिंह विष्टले बुधबार बिहान प्रहरीलाई पत्राचार गरेका थिए । तर, उक्त पत्र सर्वोच्चको आधिकारिक नरहेको भन्दै विष्टलाई कारबाहीका लागि अदालतले जिल्ला प्रहरी परिसर काठमाडौंलाई पत्राचार गरेको छ । 

शाखा अधिकृत विष्टले सर्वोच्च अदालतमा तोकिएको जिम्मेवारीभन्दा बाहिर गई अन्य पदाधिकारीलाई तोकिएको जिम्मेवारी ग्रहण गरी अदालतको लेटर प्याड, छाप र पदको दुरुपयोग गरी पत्राचार गरेको सर्वोच्चले जनाएको छ ।

उनको यो काम मुलुकी फौजदारी अपराध संहिता, २०७४ को विपरीत भएकाले विष्टलाई सोही ऐन अनुसार कारबाहीको आवश्यक अनुसन्धान प्रक्रिया अघि बढाउन भनिएको छ ।