प्रतिनिधि सभाका स्वतन्त्र सांसद डा. अमशेरकुमार सिंहले गभर्नर सिफारिस समितिलाई सत्ता गठबन्धनले मजाक बनाएको टिप्पणी गरेका छन् । उनले राजनीतिक दलको कार्यकर्ताभन्दा राष्ट्र बैंक भित्रको विज्ञलाई गभर्नर बनाउन आग्रह गरे । 

बिहीवार बसेको प्रतिनिधि सभा बैठकको आकस्मिक समयमा सांसद सिंहले राजनीतिक दलको कार्यकर्तालाई नियुक्त गरेर संस्था बलियो नबन्ने बताएका हुन् । कामु गभर्नर नीलम ढुंगानालाई नै गभर्नर बनाउन उनले आग्रह गरे ।

‘राजनीतिक दलको सदस्यलाई भर्ती गर्नुपर्ने कारण के हो ? राष्ट्र बैंकभित्र विज्ञ छैन, भित्रबाट गर्दा पाप लाग्छ ?’ सांसद सिंहले प्रश्न गरे, ‘डेपुटी गभर्नरलाई बनाउन मिल्दैन ? ऐनको सिधा उल्लंघन गर्नुपर्छ ?’ 

गभर्नर सिफारिस समितिका २ सदस्यले राजीनामा दिएपछि बुधवार मात्र अर्को सिफारिस समिति बनेको छ ।