०८ साउन २०८३, शुक्रबार
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले डडेल्धुराबाट फोन गरेकै दिन उपमहासचिव जनार्दन शर्मा कांग्रेस सभापति शेरबहादुर देउवालाई भेट्न उनकै निवास पुगेका छन् ।
शर्मा र देउवाबीच शुक्रबार दिउँसो देउवानिवास बूढानीलकण्ठमा भेटघाट भएको हो । यसबारे शर्माले नै सामाजिक सञ्जालमार्फत् जानकारी दिएका छन् ।
‘पूर्वप्रधानमन्त्री तथा नेपाली कांग्रेसका सभापति शेरबहादुर देउवासँग देशको समसामयिक राजनीतिक परिस्थिति बारे छलफल’, शर्माले सामाजिक सञ्जालमा लेखेका छन् । शर्मा देउवा प्रधानमन्त्री हुँदा उनको क्याबिनेटमा अर्थमन्त्री थिए ।
शुक्रबार नै माओवादी अध्यक्ष प्रचण्डले देउवाको गृहजिल्ला डडेल्धुराबाट देउवासँग टेलिफोन संवाद गरेका थिए । ‘जनतासँग माओवादी मध्यपहाडी लोकमार्ग जनजागरण अभियान’का लागि पुगेका प्रचण्डले देउवासँग फोनमा कुरा गरेका हुन् ।
‘यो अब शेरबहादुर देउवाजीको जिल्ला भनेर पनि चिनिन्छ, देउवाजीसँग पनि सम्पर्क भयो र उहाँले पनि मेरो जिल्लामा स्वागत भन्नुभयो । डडेलधुरामा स्वागत भन्नुभएको छ’, प्रचण्डले शुक्रबार डडेल्धुरामा आयोजित पत्रकार सम्मेलनमा भनेका थिए ।
यसअघि २०८० मंसिर १५ गते नेकपा एमालेका अध्यक्ष एवं वर्तमान प्रधानमन्त्री केपी शर्मा ओलीले पनि कांग्रेस सभापति शेरबहादुर देउवासँग डडेल्धुरा पुगेका बेला फोनवार्ता गरेका थिए । मेची-महाकाली अभियानको सिलसिलामा डडेल्धुरा पुगेका ओलीले देउवासँग फोनवार्ता गरेका थिए ।
त्यतिबेला एमाले प्रमुख प्रतिपक्षी दल थियो भने अहिले माओवादी प्रमुख प्रतिपक्षी दल छ ।
