१३ असार २०८३, शनिबार
चितवन राष्ट्रिय निकुञ्जले सौराहाको राष्ट्रिय प्रकृति संरक्षण कोषमा हुर्काएको एउटा भाले गैँडा (माइला)लाई सदर चिडियाखाना ललितपुरमा पठाएको छ ।
निकुञ्जका सूचना अधिकारी अविनाश थापा मगरका अनुसार वन तथा वातावरण मन्त्रालयको गत वैशाख २४ गतेको निर्णय अनुसार २३ महिनाको सो गैँडालाई बुधबार साँझ ललितपुर पठाइएको हो ।
बर्दिया राष्ट्रिय निकुञ्जमा टुहुरो अवस्थामा रहेको माइलालाई यहाँ ल्याएर हुर्काइएको थियो ।
मन्त्रालयको निर्णय अनुसार अर्को पोथी गैँडा पनि लैजाने तयारी गरिएको छ । उनले भने, 'करिब ३० महिनाको पोथी गैँडा (पूजा)लाई पनि लैजाने तयारी गरिएको छ ।'
बुधबार नै पठाउने तयारी गरिएको भए पनि पूजा खोरमा जान नमानेपछि केही दिनपछि पठाउने तयारी गरिएको उनले बताए ।
सदर चिडियाखानामा गैँडा हेर्न आउने पर्यटकलाई देखाउनका लागि गैँडाका बच्चा लगिएको हो । हुर्काइएका गैँडा लैजाँदा मानवीय क्षति कम हुने भएकाले यस्ता गैँडा लगिने गरेको छ ।
