०६ साउन २०८३, बुधबार
गृहमन्त्री रमेश लेखकले अध्यागममा देखिएका यावत समस्या समाधानका लागि संसद्मा रहेका सबै दलको भावना समेटनेगरी छानबिन समिति गठन गरिएको बताएका छन् । समितिले अध्यागमन क्षेत्रको समस्या समाधानका लागि सुझाव सहितको प्रतिवेदन दिने उनले बताए ।
मंगलवार बसेको प्रतिनिधि सभा बैठकको शुरूमै सभामुखसँग समय लिएर मन्त्री लेखकले ९ बुँदे कार्यादेशसहित नेपाल सरकारका पूर्वमुख्य सचिव शंकरदाश बैरागीको नेतृत्वमा समिति गठन गरिएको जानकारी गराएका हुन् ।
समितिले विषयको ठीक ढंगले पहिचान गरेर आवश्यक सुधार सहितको प्रतिवेदन दिएपछि त्यसलाई समग्रतामा सम्बोधन गरिने उनले बताए । ‘सदनमा उठेका सबै भावनालाई समेटेर उच्चस्तरीय समिति गठन गरिएको छ । अध्यागमनका समग्र विषयमा देखिएका समस्या समाधान गर्नेगरी सुझाव दिने छ,’ मन्त्री लेखकले भने ।
अख्तियारले गरिरहेको काम प्रभावित नगर्नेगरी, भिजिट भिसालगायत सुझाव सहितको प्रतिवेदन पेश गर्न समितिलाई कार्यादेश दिइएको छ । ६ मन्त्रालयका प्रतिनिधिसहित समिति गठन गरिएको मन्त्री लेखकले जानकारी गराए । त्रिभुवन विमानस्थल अध्यागमन कार्यालय र भिजिट भिसा प्रकरणलाई लिएर सदन अवरुद्ध भएपछि सरकारले समिति गठन गरेको हो ।
माओवादी केन्द्रसँग भएको २ बुँदे सहमति तथा रास्वपा र राप्रपासहितका दलको माग बमोजिम समिति गठन गरिएको मन्त्री लेखकले बताए । समितिले ३० दिनभित्र आफ्नो प्रतिवेदन सरकारलाई दिने र सो सुझाव समितिले काम गर्ने उनले बताए ।
