१२ साउन २०८३, मंगलबार
पतञ्जली जग्गा प्रकरणमा भ्रष्टाचार मुद्दा खेपेका नेकपा एसका अध्यक्ष एवं पूर्वप्रधानमन्त्री माधव कुमार नेपालको तर्फबाट बहस गरेका कानून व्यवसायीले उनलाई विना धरौटीमा रिहा गर्न माग गरेका छन् ।
बुधबार विशेष अदालतमा भएको थुनछेक बहसमा नेपाल पक्षका वकिलले राजनीतिक प्रतिशोधले नेपालविरुद्ध मुद्दा लगाइएको जिकिर गरेका हुन् ।
न्यायाधीशहरू तेजनारायण सिंह राई, रामबहादुर थापा र विदुर कोइरालाको संयुक्त इजलासमा नेपालको तर्फबाट वरिष्ठ अधिवक्ता हरिहर दाहाल, शम्भु थापा, कृष्णप्रसाद भण्डारी, गोविन्द वन्दी, खम्बबहादुर खाती र रमन श्रेष्ठले बहस गरेका थिए ।
आवश्यकता परेको बखत उपस्थित हुनेगरी विना धरौटी तारिखमा रिहा गर्न उनीहरूले माग गरेका हुन् । बहसमा थापाले भने, ‘उहाँ पूर्वप्रधानमन्त्री हो, राजनीतिक प्रतिष्ठा कमाएको व्यक्ति हो । भाग्ने या प्रमाण नष्ट गर्ने होइन । विना धरौटीमा रिहा गरियोस् ।’
अख्तियारको तर्फबाट वरिष्ठ अधिवक्ता सुशील पन्त, सहन्यायाधिवक्ता उमाकान्त पौडेल, ज्ञानप्रसाद भुसाल, मोहन सागर बस्याल र उपन्यायाधिवक्ता भगवती गौतमले बहस गरेका थिए । उनीहरूले नेपाललाई थुनामा पठाउनु पर्ने जिकिर गरेका थिए ।
यो मुद्दामा आज बुधबार नै थुनछेक आदेश आउनेछ ।
पढ्नुहोस् यो पनि - अख्तियारको तर्फबाट बहस गरेका वरिष्ठ अधिवक्ता पन्तको जिकिर- माधव नेपाललाई थुनामा पठाउनु पर्छ
