अख्तियार दुरुपयोग अनुसन्धान आयोगले पाँच लाख रूपैयाँ घुस लिएको आरोपमा आन्तरिक राजस्व कार्यालय लहानका कर अधिकृत युवराज एमएस पाललाई नियन्त्रणमा लिएको छ ।

आयोगका अनुसार कर अधिकृत पालले आर्थिक वर्ष २०७८/०७९ को पूर्ण कर लेखापरीक्षणका लागि पेस गरिएका कागजात नमिलेको भन्दै सेवाग्राहीलाई दुःख हैरानी दिई घुस मागेको भन्ने सूचना तथा उजुरीका आधारमा अनुसन्धान अघि बढाइएको थियो ।

आयोगको कार्यालय बर्दिवासबाट खटिएको टोलीले पाललाई सेवाग्राहीबाट ५ लाख रूपैयाँ घुस लिइसकेको अवस्थामा उक्त रकम र एक थान मोबाइलसहित बिहीबार आफ्नै कार्यकक्षबाट नियन्त्रणमा लिएको आयोगले जनाएको छ ।

घटनाबारे थप अनुसन्धान भइरहेको आयोगका प्रवक्ता सुरेश न्यौपानेले जनाएका छन् ।