०१ असार २०८३, सोमबार
नेपाली कांग्रेसका सांसद विश्वप्रकाश शर्माले रसुवाको लेन्दे नदीमा आएको बाढीले पुर्याएको क्षतिपछि उद्धार र राहतलाई प्रभावकारी बनाउन आग्रह गरेका छन् ।
प्रतिनिधिसभा बैठकको आकस्मिक समयमा बोल्दै मंगलबार शर्माले वर्षायामसँगै गम्भीर घटना हुन थालेको भन्दै सरकार सचेत हुनुपर्ने बताए ।
‘रसुवाको लेन्दे नदीमा १८ बढी बेपत्ता, नेपाल र चीन जोड्ने मितेरी पुल बगाएको छ । एक सय बढी कन्टेनर गाडी बगाएको दु:खद् खबर आएको छ । जल्दै गरेको चितासहितको लास बगाएको मार्मिक घटना भयो,’ शर्माले भने, ‘प्राकृतिक विपत्ति बेहोर्दै आएको छ । असोज १२ मा पनि विपत्ति बेहोर्यौं । घटनापूर्व विपत्को सामना गर्ने तयारी सरकारले गरोस् । बाढी जलवायु परिवर्तनको कारण हो के हो ? यसतर्फ पनि ख्याल गर्नुपर्छ ।’
त्यस्तै, बैठकमा कांग्रेसकै सांसद अर्जुननरसिंह केसीले पनि रसुवाको गोसाइँकुण्ड गाउँपालिकामा ठूलो मानवीय र भौतिक क्षति भएको भन्दै सरकार थप सचेत हुनुपर्ने बताए । उद्धार, राहत र पुनःस्थापनामा सरकारले प्रभावकारी अग्रसरता देखाउनुपर्ने उनको भनाइ थियो ।
माओवादी सांसद देवेन्द्र पौडेलले पनि सरकारले रसुवा बाढीपछि तत्काल सक्रियता देखाउनुपर्ने बताए । उनले डाक्टरहरू उपभोक्ता अदालत कि मेडिकल काउन्सिल भन्नेमा हड्तालमा रहँदा बिरामीले उपचार नपाएको बताए ।
सरकारी अस्पताल बन्द हुने र निजी अस्पताल खुल्ने स्थिति रहेको उनले बताए । सरकारले नागरिकलाई उपचारको हकबाट वञ्चित हुनुपर्ने अवस्था अन्त्य गर्नुपर्ने सांसद पौडेलले बताए ।
