दलित आन्दोलनका अग्रज  तथा पूर्वराजदूत पदम सुन्दास यस वर्षको प्रतिष्ठित 'कर्मयोगी बद्री पहाडी समाजसेवा पुरस्कार'बाट सम्मानित भएका छन् । 

मानव अधिकार तथा शान्ति समाजद्वारा स्थापित १ लाख १० हजार राशिको यो पुरस्कार सोमबार शीतल निवासस्थित राष्ट्रपति कार्यालयमा आयोजित एक विशेष समारोहमा राष्ट्रपति रामचन्द्र पौडेलले सुन्दासज्यूलाई हस्तान्तरण गरेका हुन् । 

सामाजिक न्याय, समानता र समावेशिताको क्षेत्रमा पुर्‍याएको विशिष्ट योगदानको कदर गर्दै मानव अधिकार तथा शान्ति समाजले पूर्वराजदूत सुन्दासलाई यो पुरस्कार प्रदान गरेको हो । सुन्दास समता फाउन्डेसनका संस्थापक अध्यक्ष तथा बहराइनका लागि नेपालका पूर्वराजदूतसमेत हुन् ।

राष्ट्रपति पौडेलले सामाजिक न्यायको लामो र कठिन यात्रामा पदम सुन्दासले देखाएको अथक प्रतिबद्धता र नेतृत्वको प्रशंसा गरे । यो पुरस्कारले सामाजिक रूपान्तरणका लागि व्यक्तिगत जीवनको बलिदान र समर्पणलाई पनि उच्च सम्मान गरेको सन्देश दिएको छ । 

विसं. २००२ साल असार ३२ गते भोजपुरमा जन्मिएका पदम सुन्दास विगत ६ दशकभन्दा बढी समयदेखि सामाजिक न्यायका क्षेत्रमा निरन्तर क्रियाशील छन् । सिभिल इन्जिनियरिङमा डिप्लोमा हासिल गरेका सुन्दासले २०६८ सालमा प्रधानमन्त्री कार्यालयअन्तर्गत जातीय भेदभाव तथा छुवाछुत अन्त्य तथा दलित अधिकार प्रवर्द्धन संयन्त्रको राष्ट्रिय सल्लाहकार समिति सदस्यका रूपमा महत्त्वपूर्ण भूमिका निर्वाह गरेका थिए ।

विशेषगरी २०७२ सालमा दलितमैत्री संविधान निर्माणका लागि गरिएको तीन महिने शान्तिपूर्ण संयुक्त दलित आन्दोलनमा उनले नागरिक समाजको संयोजकको रूपमा नेतृत्वदायी भूमिका खेलेका थिए । 

मानव अधिकार तथा शान्ति समाजले सामाजिक न्यायका लागि निरन्तर संघर्षरत व्यक्तित्वहरूलाई सम्मान गर्ने आफ्नो परम्परा कायम राख्दै यस वर्ष पदम सुन्दासलाई छनोट गरेको हो।