विश्व फूटबल महासंघ (फिफा)ले अखिल नेपाल फूटबल संघ (एन्फा)माथि लगाएको ‘कन्ट्रोल फन्डिङ’को बन्देज हटेको छ ।

आर्थिक अपारदर्शिता र भ्रष्टाचारको आरोपमा फिफाले २०२१ मार्चमा एन्फामाथि ‘कन्ट्रोल फन्डिङ’ लागू गरेको थियो ।​​ उक्त 'कन्ट्रोल फन्डिङ' १० जुलाई २०२५ को निर्णयअनुसार हटाइएको फिफाको पत्राचार प्राप्त भएको एन्फाले जनाएको छ ।

'१० जुलाई २०२५ को निर्णयअनुसार फिफाबाट कायम रहेको 'कन्ट्रोल फन्डिङ' हटाइएको फिफाको पत्राचारबाट जानकारी प्राप्त भएको छ । साथै समग्र विकास आर्थिक पारदर्शिता, सुशासन र फूटबल खेल प्रवर्द्धनमा उत्कृष्ट योगदान गरेवापत AFC Member Association Of The Year (Gold) Award 2024 बाट पनि सन् २०२४ अक्टोबर २९ तारिखका दिन एएफसीबाट पुरस्कृत भएको थियो​,' एन्फाद्वारा जारी विज्ञप्तिमा उल्लेख छ ।​​ 

‘कन्ट्रोल फन्डिङ’को बन्देज हटेसँगै एन्फाले विभिन्न पूर्वाग्रही र स्वार्थ समूहहरूले फूटबलको विकासमा अवरोध ल्याउन खोजे पनि सत्यताले विजय प्राप्त गरेको जनाएको छ ।