अध्यक्ष राजेन्द्र लिङदेनले स्वेच्छाचारी ढंगले आफूलाई अनुशासन समितिबाट हटाएको भन्दै राप्रपा नेता नवराज सुवेदी निर्वाचन आयोग पुगेका छन् । महामन्त्री धवलशमशेर जबरासहितका नेतालाई लिएर सुवेदी आइतवार आयोग पुगेका हुन् ।

आफूलाई अनुशासन आयोगबाट हटाउने निर्णय बदर गर्न माग गर्दै सुवेदीले आयोगमा निवेदन दिएका छन् । राजतन्त्र पुनःस्थापना संघर्ष समितिको संयोजक समेत रहेका सुवेदीलाई अनुशासन समितिको अध्यक्षबाट हटाएर लिङदेनले रोशन कार्कीलाई जिम्मा दिएका थिए ।

आयोगमा निवेदन दिएपछि सुवेदीले अध्यक्षको स्वेच्छाचारी निर्णय प्राकृतिक न्यायको खिलापमा रहेकोले आयोगमा धाउनु परेको बताए । ‘किन कारबाही  गरियो ? मलाई सोधिएको पनि छैन, मैले मिडियाबाट थाहा पाएँ, मलाइ निकाल्नु भयो,’ उनले भने, ‘ पार्टीमा भएको अन्यायको खिलापमा हामी यहाँ आएका हौं । पार्टी बलियो होस्, पार्टीभित्र षडयन्त्र नहोस् भनेर आयौं । पार्टी फुट्दैन ।

महामन्त्री धवलशमशेर जबराले पार्टीलाई सहमतिमा चलाऔं, लामो योगदान भएकालाई पार्टीबाट निकाल्ने काम नहोस् भनेर आयोग धाउनु परेको बताए ।