नेकपा एमालेका सांसद किरणकुमार साहले घुस काण्डमा मुछिएका संघीय मामिला तथा सामान्य प्रशासनमन्त्री राजकुमार गुप्ताको राजीनामा माग गरेका छन् ।

सोमबार बसेको प्रतिनिधिसभा बैठकको शून्य समयमा सांसद साहले मन्त्री गुप्तालाई बर्खास्त गर्न माग गरेका हुन् ।

‘सामान्य प्रशासनमन्त्री राजकुमार गुप्ताजीले घुस डिल गरेको अडियो सार्वजनिक भइसकेको अवस्थामा सरकार किन मौन छ ? दुनियाँले सुनेको अडियो सरकारले नसुनेको झैँ गर्नु लोकतन्त्रको अपमान हो । म यो सदनमार्फत माग गर्दछु, गुप्ताज्यूलाई बर्खास्त गरियोस् र निष्पक्ष छानबिन होस्,’ सांसद साहले भने ।

रौतहटबाट स्वतन्त्र चुनाव जितेका सांसद साह पछि नेकपा एमाले प्रवेश गरेका थिए । उनी संसद्को महिला, बालबालिका तथा समाजकल्याण समितिको सभापति छन् ।

प्रतिनिधिसभा बैठकमा राप्रपा अध्यक्ष राजेन्द्र लिङ्देनले पनि घुस काण्डका मुछिएका मन्त्रीहरूको राजीनामा माग गरेका थिए ।