एनसेलले आफ्ना ग्राहकहरूलाई नगद पुरस्कार दिने ‘सधैं अन करोडपति’ योजना बन्द गरेको छ । आज साउन १ गते एक सार्वजनिक सूचना प्रकाशित गर्दै यो योजना नेपाल दूरसञ्चार प्राधिकरणको निर्देशन बमोजिम आजैबाट लागु हुनेगरी बन्द गरेको कम्पनीले जनाएको छ ।

असार १ गतेबाट सञ्चालनमा ल्याइएको योजनामा हरेक हप्ता १० जना ग्राहकले जनही १ लाख पाउँदै आएका थिए भने बम्पर पुरस्कारमा नगद पुरस्कारका रूपमा एक जनालाई १ करोड दिने घोषणा गरेको थियो । यो योजना पाँचौ हप्तामा चलिरहेको थियो । 

'ग्राहकवर्गहरूलाई पुरस्कृत गर्ने उद्देश्यले सञ्चालन गरेको एनसेल ‘सधैं अन करोडपति’ योजना नेपाल दूरसञ्चार प्राधिकरणको निर्देशन बमोजिम आजैका मिति २०८२ श्रावण १ (जुलाई १७, २०२५)बाट लागु हुनेगरी बन्द गरिएको व्यहोरा सम्पूर्ण ग्राहकवर्गहरूको जानकारीको लागि सादर अनुरोध गर्दछौं । यसबाट ग्राहकवर्गहरूमा पर्न गएको असुविधाप्रति हामी क्षमाप्रार्थी छौं,' एनसेलले जारी गरेको सूचनामा भनिएको छ ।

प्राधिकरणको निर्देशन बमोजिम योजना बन्द गरे पनि एनसेलले एक जिम्मेवार संस्थाको रूपमा हिजोसम्म योजनामा सहभागी ग्राहकहरूको हितलाई ध्यानमा राख्दै आज साँझ बम्पर १ करोड नगद पुरस्कार विजेता १ जना र पाँचौ हप्ताको जनही १/१ लाख विजेता १० जना भाग्यशाली ग्राहकको घोषणा गर्ने भएको छ । 

भाग्यशाली ग्राहकहरूको छनोट आज साँझ ५ बजेदेखि ६ बजेको बीचमा कान्तिपुर टीभी, एनसेल एप र एनसेलको यूट्युब च्यानलमार्फत् गरिने एनसेलले जनाएको छ ।