भारत सरकारको करिब ३ करोड रूपैयाँ आर्थिक सहयोगमा झापाको शिवसताक्षी नगरपालिका–६ स्थित जन आदर्श माध्यमिक विद्यालयको नयाँ भवन निर्माण हुने भएको छ ।

विद्यालय भवन निर्माणका लागि बिहीबार कोशी प्रदेशसभा सदस्य राधाकृष्ण खनाल, शिवसताक्षी नगरपालिकाका मेयर मेगाहाङ थोप्रा तथा काठमाडौंस्थित भारतीय राजदूतावासकी द्वितीय सचिव गरिमा नौटियालले संयुक्त रूपमा शिलान्यास गरेका हुन् ।

भारतीय राजदूतावासका अनुसार उक्त भवन उच्च प्रभाव सामुदायिक विकास परियोजना (एचआईसीडीपी) अन्तर्गत निर्माण गरिनेछ । परियोजना शिवसताक्षी नगरपालिकामार्फत कार्यान्वयन हुनेछ ।

शिलान्यास कार्यक्रममा शिवसताक्षी नगरपालिकाका मेयरसहित अन्य सरोकारवालाले भारत सरकारबाट प्राप्त विकास सहयोगको प्रशंसा गर्दै नयाँ विद्यालय भवनले विद्यार्थी र शिक्षकका लागि थप गुणस्तरीय र सुविधासम्पन्न सिकाइ वातावरण निर्माण गर्न सहयोग पुग्ने विश्वास व्यक्त गरेका थिए ।

भारतीय राजदूतावासले भारत र नेपालबीच निकट छिमेकीका रूपमा बहुआयामिक सहकार्य रहँदै आएको उल्लेख गर्दै उच्च प्रभाव सामुदायिक विकास परियोजनामार्फत प्राथमिकताका क्षेत्रमा पूर्वाधार विकास गर्दै नेपाल सरकारको विकास र समृद्धिको प्रयासलाई निरन्तर सहयोग गर्दै आएको जनाएको छ ।