०६ साउन २०८३, बुधबार
साविक विजेता इङ्ल्यान्ड महिला युरो कप फुटबल प्रतियोगिताको फाइनलमा पुगेको छ । स्विट्जरल्यान्डमा जारी प्रतियोगिताको पहिलो सेमिफाइनल खेलमा बलियो प्रतिद्वन्द्वी इटालीलाई अतिरिक्त समयमा २–१ गोलले हराउँदै इङ्ल्यान्ड फाइनलमा पुगेको हो ।
इङ्ल्यान्डले अब उपाधिका लागि जर्मनी वा स्पेनसँग भिडन्त गर्नेछ । प्रतियोगिताको दोस्रो सेमिफाइनल खेल जर्मनी र स्पेनबीच खेलिने छ । अघिल्लो संस्करणको फाइनलमा पनि इङ्ल्यान्डले जर्मनीलाई अतिरिक्त समयमा २–१ गोलले हराउँदै उपाधि चुमेको थियो ।
पहिलो सेमिफाइनल खेलमा शुरूआती अग्रता लिएर पनि इटालीले त्यसलाई जोगाउन सकेन । खेल शुरू भएको ३३औँ मिनेटमा इटालीका लागि बार्बरा बोनान्सियाले गोल गरेकी थिइन् । सोही गोलका कारण पहिलो हाफमा इटाली १–० ले अगाडि रह्यो ।
प्रतिस्पर्धात्मक खेलको दोस्रो हाफको इन्जुरी समयमा मिशेल अगएमाङले इङ्ल्यान्डका लागि जवाफी गोल गरेकी थिइन् । त्यसपछि खेल अतिरिक्त समयतर्फ धकेलिएको थियो । खेलको ११९औँ मिनेटमा इङ्ल्यान्डका लागि म्यागी केलीले निर्णायक गोल गरेकी थिइन् ।
