०५ साउन २०८३, मंगलबार
प्रहरीले गुण्डागर्दीमा संलग्न विभिन्न व्यक्तिहरूलाई पक्राउ गरेको छ । बिहीबार मध्यराति महाराजगञ्ज क्षेत्रमा अपरेसन चलाएर प्रहरीले गुण्डा नाइके चक्रे मिलनसहित गुण्डागर्दीमा संलग्न ६७ जनालाई पक्राउ गरेको हो ।
महाराजगञ्जमा गुण्डा नाइके चक्र मिलनको बर्थ डे मनाएर होहल्ला गरिरहेको अवस्थामा काठमाडौं उपत्यका अपराध अनुसन्धान कार्यालय र काठमाडौं प्रहरी परिसरको संयुक्त टोलीले उनीहरूलाई पक्राउ गरेको हो ।
अनुसन्धान कार्यालयका प्रवक्ता एवं प्रहरी उपरीक्षक काजीकुमार आचार्यका अनुसार चक्रे मिलनको ‘बर्थडे पार्टी’मा गुण्डागर्दीमा संलग्न व्यक्तिहरू भेला भएको सूचनाको आधारमा प्रहरीले अपरेसन चलाएको थियो ।
विगत दुई/तीन दिनदेखि सडकमा दुईतर्फी गाडी राखेर होहल्ला गरेको र टिकटक बनाएर शान्ति भङ्ग गरेको गुनासो प्रहरीमा आएको थियो । सोही सूचना र गुनासोका आधारमा प्रहरीले अपरेसन चलाएको प्रहरी उपरीक्षक आचार्यले बताए ।
पक्राउ परेका ६७ जनाको स्क्रिनिङ भैरहेको उनको भनाइ छ । 'सबैजना गुण्डागर्दीमा संलग्न होइनन्, स्क्रिनिङ गरेर कसलाई छाड्ने कसलाई राख्ने निर्णय हुन्छ,' लोकान्तरसँग उनले भने ।
प्रहरीले गुण्डागर्दीमा संलग्न ‘सानुभाइ’ भनिने युवराज गुरुङलाई बुधबार राति पक्राउ गरेको थियो । दोहोरीमा अर्को समूहसँग झगडा गरेपछि उनी पक्राउ परेका हुन् ।
रेष्टुरेण्ट र रात्रि क्लबमा बसेर झैझगडा गर्ने र हप्ता असुल्ने गरेको गुनासो आएपछि प्रहरीले गुण्डागर्दीमा संलग्नलाई पक्राउ गर्ने अभियान चलाएको हो ।
