०६ साउन २०८३, बुधबार
नेपाली खेलाडी प्रशान्त राईले एसियन कुराश च्याम्पियनसिप– २०२५ मा कास्य पदक जितेका छन् ।
दक्षिण कोरियाको चेओङ्जु शहरमा जारी प्रतियोगितामा प्रशान्तले जुनियर पुरुष ४२ केजीभन्दा मुनिको तौलसमूहमा कास्य पदक जितेका नेपाल कुराश संघले जनाएको छ ।
प्रशान्त सेमिफाइनल उज्वेकिस्तानका खेलाडीसँग पराजित भएका थिए । एसियाली कुराश महासंघको आयोजनामा जुलाई ३० तारिखदेखि शुरू भई अगस्ट ५ तारिखसम्म चल्ने उक्त प्रतियोगितामा प्रशान्तको स्पर्धामा भारत, तुर्कमेनिस्तान, मङ्गोलिया, चीन (ताइपेईं) र कुवेतका खेलाडीले प्रतिस्पर्धा गरेका थिए ।
प्रतियोगितामा नेपालबाट दुई खेलाडी सहभागी छन् ।
एसियन कुराश च्याम्पियनसिपमा यो नेपालको दोस्रो पदक हो । यसअघि सन् २०१८ मा थाइल्यान्डमा भएको एसियन कुराश च्याम्पियनसिपमा कृति शर्माले ५२ केजीमुनि कास्य पदक जितेकी थिइन् ।
प्रतियोगिताका क्रममा कुराश संघका कार्यवाहक अध्यक्ष जीवन राईले एसियन कुराश कंग्रेसमा पनि भाग लिएको कुराश संघले जनाएको छ ।
