२६ जेठ २०८३, मंगलबार
अजरबैजानको राजधानी बाकुमा सम्पन्न विश्व बुदो मार्सल आट्र्स च्याम्पियनसिपमा दुई–दुई स्वर्ण पदक विजेता खेलाडीलाई चाँगुनारायण नगरपालिकाले सम्मान गरेको छ ।
चाँगुनारायण नगरपालिकाबाट प्रतिनिधित्व गर्दै बाकु गएका चाँगुनारायण नगरपालिका–७ का रोचक भारती र पूजा खड्काले दोहोरो स्वर्ण पदक विजेता बन्दै नगरपालिका र देशकै नाम राखेको भन्दै आज नगरपालिकाले सम्मान गरेको हो । पन्ध्र वर्षभन्दा कम उमेर समूहतर्फ खड्का र भारतीले क्रमशः ४० किलो र ७० किलो तौल समूहमा प्रतिस्पर्धा गर्दै स्वर्ण पदक जितेका हुन् ।
नगरपालिकाका प्रमुख जीवन खत्रीले स्वर्ण पदक विजेता भारती र खड्कालाई चाँगुनारायण नगरपालिकासँगै देशकै नाम उच्च राख्न सफल भएको भन्दै सम्मान गरेका हुन् । नगरप्रमुख खत्रीले भने, “नगरपालिकाले खेलकुदलाई पनि उच्च प्राथमिकतामा राखेर खेलाडीहरु उत्पादन गरिरहेको छ । हरेक दिन नगरपालिकाले खेल प्रशिक्षकद्वारा विभिन्न खेलमा प्रशिक्षण दिँदै आएको छ । विद्यालयस्तरमा समेत खेलाडी उत्पादन गर्न नगरपालिकाले सहयोग गर्दै आएको छ ।”
