नेपाली कांग्रेसले अन्य दललाई गाली गरेर संसद् बहिष्कार गर्ने रास्वपा र राप्रपाको कार्यशैलीप्रति आपत्ति जनाएको छ । रास्वपाले संसद्लाई दुरुपयोग गरेर जनतालाई दिग्भ्रमित पारेको कांग्रेसको आरोप छ ।

सोमबार बसेको प्रतिनिधिसभा बैठकको आकस्मिक समयमा कांग्रेस संसदीय दलका प्रमुख सचेतक श्यामकुमार घिमिरेले रास्वपाको शैलीविरुद्ध सबै सांसद प्रतिवादमा उत्रिनु पर्ने दिन आउन सक्ने चेतावनी दिएका हुन् ।

‘७० दिनदेखि रास्वपा र राप्रपाले संसद् बहिष्कार गर्दै आएका छन् । शुरूमा आफ्नो कुरा राख्ने, त्यसपछि बहिष्कार गर्दै हिँड्ने । कति दिनसम्म यो चल्ने हो ? संसद्‌मा उभिएर सधैं गालीगलोज गर्ने ?,’ घिमिरेले प्रश्न गरे ।

रास्वपाको कार्यशैली जर्मन तानाशाह हिटलरका प्रवक्ता गोयबल्सको जस्तो रहेको घिमिरेले आरोप लगाए । ‘भिजिट भिसाका नाममा मानव तस्करी गरियो भन्ने ? यो के भन्न खोजेको ? गोयबल्स शैलीमा झुटो कुरा प्रचार गरेर जनतालाई दिग्भ्रमित पार्ने र संसद्लाई दुरुपयोग गर्ने जुन अभ्यास चलेको छ, यो बन्द हुनुपर्छ,’ घिमिरेले भने, ‘भोलि यसले गर्दा सम्पूर्ण सांसद प्रतिवादमा उभिनु पर्ने हुनसक्छ । त्यो बेला संसद्को अवस्था के हुन्छ ?’

भिजिट भिसा प्रकरणमा छानबिनको माग गर्दै रास्वपाले जेठ १२ गतेदेखि प्रतिनिधिसभामा विरोध जारी राख्दै आएको छ ।

सोमबार पनि रास्वपाले आफ्ना कुरा राखेर संसद् बहिष्कार गरेको थियो ।