१८ असार २०८३, बिहीबार
काभ्रे, २५ मंसिर– विजय गच्छदारसँगै लोकतान्त्रिक फोरमबाट कांग्रेस प्रवेश गरेका डन पृष्ठभूमिका कांग्रेस उम्मेदवार गणेश लामा काभ्रेमा पराजित हुने निश्चित भएको छ ।
लामा काभ्रे क्षेत्र नम्बर १ को प्रदेशसभा (ख) बाट प्रदेशसभा सदस्यका उम्मेदवार छन् । उनी वाम गठवन्धनका संयुक्त उम्मेदवार एमाले नेता चन्द्र लामाभन्दा ३ हजार २ सय २० मतले पछाडि परेका छन् ।
पछिल्लो परिणामअनुसार कांग्रेसका लामाले १७ हजार ७ सय ३० मत ल्याएका छन् । एमालेका चन्द्र लामाले २० हजार ९ सय ३८ मतसहित अग्रता लिइरहेका छन् । काभ्रे क्षेत्र नम्बर १ को मतगणना अन्तिमतर्फ पुगेको छ ।
गुण्डागर्दीमा संलग्न भएको अभियोगमा पटक पटक प्रहरी हिरासतमा पुगिसकेका गणेश लामा विजय गच्छदार गृहमन्त्री हुँदा राजनीतिमा सक्रिय भएका थिए ।
चुनाव अघि गच्छदार कांग्रेसमा विलय हुँदा लामा पनि कांग्रेसमा प्रवेश गरेका थिए । कांग्रेसले उनलाई काभ्रे क्षेत्र नम्बर १ को प्रदेशसभा (ख) को उम्मेदवार बनाएको थियो ।
काभ्रे क्षेत्र नम्बर १ को प्रदेशसभा (क) मा भने वाम गठवन्धनका संयुक्त उम्मेदवार माओवादीका रत्न ढकाल विजयी भइसकेका छन् । कांग्रेसका सिवी लामालाई ८ हजार मतान्तरले पराजित गरेर ढकाल विजयी भएका हुन् ।
माओवादीका ढकालले २५ हजार १ सय ६ मत ल्याएर विजयी हुँदा कांग्रेसका लामाले १७ हजार ८ सय ५५ मत प्राप्त गरे ।
