नेकपा एमालेले आगामी विधान महाधिवेशनमा मुख्य चार एजेण्डामा छलफल हुने टुंगो लगाएको छ । एमालेले आगामी भदौ २० देखि २२ गतेसम्म गोदावरीमा हुने महाधिवेशनका लागि चार एजेण्डा तय गरेको हो ।

एमाले महासचिव शंकर पोखरेलले विधान महाधिवेशन नीति निर्माण र विधि स्थापित गर्ने गरी चार एजेण्डा तय भएको जानकारी दिए । विधान महाधिवेशनको तयारी र प्रचार योजनाका सन्दर्भमा केन्द्रीय प्रचार विभागले मंगलबार आयोजना गरेको बैठकमा बोल्दै महासचिव पोखरेलले मूलत: विधि र पद्धति स्थापित गर्दै पार्टीलाई एक लयमा हिँडाउने गरी योजना बनाइएको बताए । 

महासचिव पोखरेलका अनुसार विधान महाधिवेशनमा चार वटा एजेण्डा छन् । जसमा राजनीतिक प्रतिवेदन, सांगठानिक प्रतिवेदन, विधान संशोधन प्रस्ताव र केन्द्रीय निकायका रूपमा रहेका चार सल्लाहकार परिषद् र तीन आयोगको प्रतिवेदन प्रस्तुत हुनेछन् । यस्तै, महाधिवेशनले समसामयिक प्रस्ताव पनि पारित गर्ने कार्यसूची रहेको छ ।

‘विधान महाधिवेशनले अब हामी कसरी अघि बढ्ने भन्ने पार्टीको नीति विधि बनाउँछ । राजनीतिक प्रतिवेदन र संगठन कसरी जान्छ भन्ने निर्धारणसहित संगठनात्मक प्रस्तावलाई पारित गर्छ । हामी आफूलाई कसरी सञ्चालन गर्छौं भन्ने कुरा निर्धारण गरी विधि निर्माण गर्छौं र केन्द्रीय निकायको प्रतिवेदनमाथि छलफल गरी सुझावसहित पारित गर्छौं,’ विधान महाधिवेशनको एजेण्डाबारे महासचिव पोखरेलले भने ।

महाधिवेशनमा प्रस्तुत गर्ने विधान संशोधन प्रस्तावका लागि एमालेले सचिवालय, पोलिटब्यूरो र केन्द्रीय कमिटीमा छलफल गरी अन्तिम रूप दिएर सुझावका लागि देशभर पठाएको छ । प्राप्त सुझावका आधारमा संयोजक उपाध्यक्ष विष्णु पौडेल नेतृत्वको समितिले मस्यौदालाई अन्तिम रूप दिनेछ ।

यस्तै, महाधिवेशनमा अध्यक्ष तथा प्रधानमन्त्री केपी शर्मा ओलीले राजनीतिक प्रतिवेदन, महासचिव पोखरेलले सांगठानिक प्रतिवेदन प्रस्तुत गर्नेछन् । यस्तै, महाधिवेशनमा केन्द्रीय अनुशासन आयोगका अध्यक्ष केशव बडाल, लेखा आयोग अध्यक्ष डा. पुष्प कँडेल, निर्वाचन आयोग अध्यक्ष डा. विजय सुब्बा र सल्लाहकार परिषद् सभापति अमृतकुमार बोहोराले प्रतिवेदन प्रस्तुत गर्ने एजेण्डा रहेको छ ।

प्रचार कार्ययोजना बनाउन कार्यदल गठन

एमालेको विधान महाधिवेशन आगामी भदौ २० देखि २२ गतेसम्म ललितपुरको गोदावरीस्थित सनराइज अन्तर्राष्ट्रिय सम्मेलन केन्द्रमा हुँदैछ । त्यसको तयारीका लागि एमालेले विभिन्न उपसमिति बनाइसकेको छ । प्रचारका लागि केन्द्रीय प्रचार विभाग प्रमुख स्थायी कमिटी सदस्य राजेन्द्र गौतमको संयोजकत्वमा प्रचार उपसमिति गठन भएको छ ।

समितिमा विभाग र प्रेस चौतारीका पदाधिकारीसहित नेकपा एमाले बागमती प्रदेश, जिफन्ट, युवा संघ, अनेरास्ववियु र नेपाल बौद्धिक परिषद्‍का प्रचार विभाग प्रमुख सदस्य रहेका छन् ।

उपसमिति प्रमुख गौतमले प्रचारको काम अघि बढिसकेको भन्दै तीन दिनभित्र स्पष्ट कार्ययोजना पेस गर्न कार्यदल गठन भएको जानकारी दिए । 

प्रमुख गौतमका अनुसार कार्यदलमा केन्द्रीय प्रचार विभाग सदस्य गणेश बस्नेत, गणेश पाण्डे, श्रीधर आचार्य, चेतन अधिकारी, दीपक ज्ञवाली, विश्वमणि सुवेदी र जिफन्टका प्रचार विभाग प्रमुख महेन्द्र श्रेष्ठ छन् । कार्यदलले सम्मेलन स्थलमा मिडिया व्यवस्थापनदेखि प्रचारका अन्य योजनाबारे सुझावसहित प्रतिवेदन बुझाउने कार्यादेश पाएको छ ।