१४ असार २०८३, आइतबार
राष्ट्रपति रामचन्द्र पौडेलले भारतमा भएको ‘म्याट्रिक्स फाइटर नाइट’को उपाधि विजेता एमएमए फाइटर रवीन्द्र ढाँटलाई सम्मान गरेका छन् ।
बुधबार दिउँसो राष्ट्रपति भवन शीतल निवासमा रवीन्द्रका लागि सम्मान कार्यक्रम राखिएको थियो ।
‘बझाङको बाघ’ उपनामले परिचित ढाँटलाई बधाई दिँदै राष्ट्रपति पौडेलले उनको जितले देशकै गौरव बढेको उल्लेख गरे ।
समारोहमा राष्ट्रपति पौडेलले खेलाडीहरूको भविष्य खेलकुद क्षेत्रमै सुरक्षित गर्नेतर्फ सरकारले ध्यान दिनुपर्ने बताए ।
खेलकुदले व्यक्तिको शारीरिक, मानसिक र समग्र व्यक्तित्व विकासमा महत्त्वपूर्ण भूमिका खेल्ने बताउँदै राष्ट्रपति पौडेलले ढाँटको खेल कौशल, सामर्थ्य र खेलप्रतिको समर्पणको उच्च प्रशंसा गरे ।
त्यसक्रममा ढाँटले खेलको विकास लागि सरकारको सहयोग आवश्यक रहेको बताए । उनले धेरै युवाहरू एमएमए (मिक्स्ड मार्सल आर्ट्स)मा केही गर्न खोजीराखेको समेत उल्लेख गरे ।
रवीन्द्रले भारतको नोएडामा भएको म्याट्रिक्स फाइट नाइट (एमएफए) १७ मा भारतका चोंगरेंग कोरेनलाई हराउँदै बान्टमवेट च्याम्पियन बनेका थिए ।
