०३ साउन २०८३, आइतबार
विद्यालय शिक्षा विधेयकमा छलफल गर्न आज शिक्षा समितिको बैठक बस्दै छ । शिक्षा, स्वास्थ्य तथा सूचना प्रविधि समितिको बैठक बिहीबार दिउँसो २ बजे बोलाइएको छ।
बैठकमा विद्यालय शिक्षा विधेयकसम्बन्धी उपसमितिको प्रतिवेदनमाथि छलफल हुने छ । यसअघि पटक-पटक बसेका बैठकमा पनि विधेयकमा सहमति जुट्न सकेको छैन । तर, आजको बैठकमा सहमति जुटाउनेगरी तयारी भैरहेको समितिका एक सदस्यले बताए ।
सरकारले आन्दोलनरत शिक्षकहरूसँग असार १५ गतेसम्म विधेयक संसद्बाट पारित गर्ने सहमति गरेको भए पनि अझै विधेयकमा सहमति जुट्न सकेको छैन ।
त्यसपछि शिक्षक महासंघले विधेयक पारित गर्न साउन २१ सम्मको अल्टिमेटम दिएको थियो । जुन हिजै सकिएको छ ।
यसअघि बुधबार विधेयकमा सहमति जुटाउन दलहरूबीच छलफल भएको थियो । समितिमा रहेका सदस्यहरूबीच मंगलवार पनि छलफल भएको थियो ।
शिक्षकहरूले आन्तरिक प्रतिस्पर्धाको कोटा ७५ प्रतिशत बनाउन दबाब सृजना गरे पनि समितिमा सहमति जुट्न नसकेको हो । अस्थायी प्रकृतिका शिक्षकलाई स्थायी गर्दा कूल दरबन्दीको ६० प्रतिशत आन्तरिक प्रतिस्पर्धाबाट गर्ने प्रावधानसहित विधेयकमा सहमतिको प्रयास भइरहेको समिति स्रोतले बतायो ।
यसअघि असार २२ गते नै विधेयक पारित गर्ने तयारी भए पनि सरकारले समय माग गरेका कारण रोकिएको थियो । शिक्षा मन्त्री रघुजी पन्तले समय माग गरेपछि समितिले अन्तिम पटकका लागि भन्दै ५ दिनको समय दिएको थियो ।
