२८ जेठ २०८३, बिहीबार
सहकारी ठगी मुद्दामा पुर्पक्षका लागि थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले रिहाइको माग गर्दै जिल्ला अदालत, रुपन्देहीमा दायर गरेको निवेदनमाथि अहिले सुनुवाइ भइरहेको छ ।
सुप्रिम सहकारी बुटवलको बचत अपचलन र संगठित अपराधको अभियोगमा पुर्पक्षका लागि थुनामा रहेका लामिछानेले दिएको निवेदनमाथि न्यायाधीश नारायण सापकोटाको इजलासमा सुनुवाइ भइरहेको छ ।
अदालतका सूचना अधिकारी तथा शाखा अधिकृत पदम अर्यालले रविको निवेदनमाथि सुनुवाइ सकिए सोमबार नै आदेश आउन सक्ने सम्भावना रहेको लोकान्तरलाई जानकारी दिए ।
सुनुवाइपछि लामिछानेलाई मुद्दाको पुर्पक्षका लागि धरौटीमा थुनामुक्त गर्ने कि थुनामै राख्ने भन्ने आदेश आउने सूचना अधिकारी अर्यालको भनाइ छ ।
बुटवलको सुप्रिम सहकारी ठगी अभियोगमा भैरहवा कारागारमा पुर्पक्षका लागि थुनामा रहेका लामिछानेले १९ साउनमा आफूलाई जमानत लिएर रिहा गर्न माग गर्दै रुपन्देही जिल्ला अदालतमा निवेदन दर्ता गराएका थिए ।
लामिछानेले बिगोबापतको २ करोड ७४ लाख ८४ हजार रूपैयाँको बैंक जमानत पनि निवेदनसँगै पेस गरेका थिए । सुप्रिम सहकारी ठगी प्रकरणमा गत चैत २२ गते उच्च अदालत तुलसीपुरको बुटवल इजलासले लामिछानेलाई पुर्पक्षका लागि थुनामा पठाउने आदेश दिएको थियो । त्यसयता उनी जिल्ला कारागार रुपन्देही (भैरहवा)मा छन् ।
