२९ जेठ २०८३, शुक्रबार
नेकपा एमालेका अध्यक्ष एवं प्रधानमन्त्री केपी शर्मा ओलीले मदन भण्डारी फाउन्डेसनको भविष्यबारे चिन्ता व्यक्त गरेका छन् । फाउन्डेसनका पदाधिकारीका अभिव्यक्तिले गर्दा अन्योल बढाएको उनले बताए ।
मदन-आश्रित स्मृति प्रतिष्ठानले सोमबार पार्टी केन्द्रीय कार्यालय च्यासलमा आयोजना गरेको कार्यक्रममा अध्यक्ष ओलीले मदनको जन्मजयन्ती मनाउन नपाइएको बेला बनेको संस्था अहिले पार्टी हित विपरीत लाग्न थालेको भन्दै चिन्ता व्यक्त गरेका हुन् ।
‘मदन-आश्रितको जन्मदिन मनाउन नपाइने स्थिति बन्यो, श्रद्धाञ्जली दिन नपाइने अवस्था भयो । जन्मदिनको अघि विकृतिपूर्ण लेख लिडरसीपबाट लेखिने र प्रकाशित हुन थालेपछि एउटा संस्था बनाउनु पर्यो भनेर जन्मिएको हो मदन भण्डारी फाउन्डेसन’ ओलीले भने, ‘मदनका विचारसँग असहमत रहेर पाखण्डी व्यवहार देखाउनेहरूको ग्रिपमा नगएको हो, पार्टी र आन्दोलनको पक्षमा हो ।’
तर फाउन्डेसनको भविष्यबारे आशंका जन्मिएको उनले बताए । ‘आगामी दिनमा के हुन्छ हेर्नुपर्ने अवस्था बनेको छ, कसरी जान्छ त्यो । त्यसका पदाधिकारीको अभिव्यक्ति, आदि कुरा हेर्दा कसरी जाने हो त्यो भन्ने अन्योल छ’, ओलीले भने ।
फाउन्डेसनको ब्यानरमा पूर्वराष्ट्रपति विद्या भण्डारीले कार्यक्रम गरिरहेकी छन् । फाउन्डेसनको अध्यक्ष भण्डारीकी छोरी छन् ।
माधव कुमार नेपालको नामै उल्लेख नगरी ओलीले प्रतिष्ठान बनाएर आफ्नो स्वार्थपूर्तिमा लागेको टिप्पणी गरे ।
‘पार्टीले नै पुष्पलाल प्रतिष्ठान गठन गर्यो, केही व्यक्तिले पद छाड्दै नछाड्ने गरेर आफ्नो ग्रिपमा राख्ने, व्यक्तिको ठगीखाने भाँडोको रूपमा त्यो खालको अवलम्बन गर्ने काम भएको छ’, ओलीले भने ।
