२८ असार २०८३, आइतबार
तीन दशकपछि पाकिस्तानी क्रिकेट टोलीले क्यारेबियन भूमिमा नमिठो हारको सामना गर्नु परेको छ । घरेलु टोली वेस्ट इन्डिजले तेस्रो तथा अन्तिम एकदिवसीय अन्तर्राष्ट्रिय क्रिकेटमा दुई सय दुई रनको विशाल अन्तरले हराएको हो ।
जितसँगै वेस्ट इन्डिजले तीन खेलको एकदिवसीय शृंखला पनि २–१ ले आफ्नो पक्षमा पार्यो । टस हारेर पहिले ब्याटिङको निम्तो पाएको वेस्ट इन्डिजले निर्धारित ओभरमा ६ विकेट गुमाएर दुई सय ९४ रन बनाएको थियो ।
जवाफी ब्याटिङमा ओर्लिएको पाकिस्तानले भने २९.२ ओभरमै अलआउट हुनुअघि ९२ रनमात्र बनाउन सक्यो । पाकिस्तानका लागि सलमान अघाले सर्वाधिक ३० रन बनाए । मोहम्मद नवाजले अविजित २३ र हसन नवाजले १३ रन बनाए ।
अन्य ब्याट्सम्यानले दोहोरो अंकमा रन बनाउन सकेनन् । पाकिस्तानका पाँच ब्याट्सम्यानले त खातासम्म खोल्न सकेनन् । वेस्ट इन्डिजका बलर जेडन सिल्सले एक्लैले ६ विकेट लिए । उनले ७.२ ओभरमा केवल १८ रन खर्चिए ।
त्यसअघि, क्यारेबियन टोलीका लागि कप्तान साई होपले उत्कृष्ट शतकीय पाली खेलेका थिए । उनले अविजित एक सय २० रन बनाए । यस क्रममा उनले केवल ९४ बलको सामना गरी पाँच छक्का र १० चौका पनि हिर्काए ।
जस्टिन ग्रेभ्सले अविजित ४३ र रोस्टन चेजले ३६ रन बनाएका थिए । पाकिस्तानी टोलीका बलर नसिम शाह र अबरार अहमदले दुई–दुई विकेट लिए । वेस्ट इन्डिजका साई होप प्लेयर अफ दि म्याच र वेस्ट इन्डिजकै जेडन सिल्स प्लेयर अफ दि सिरिज घोषित भए ।
पाकिस्तानी टोलीले क्यारेबियन भूमिमा ३४ वर्षपछि एकदिवसीय शृंखला हारेको हो । यसअघि सन् १९९१–९२ मा आफ्नो घरेलु मैदानमा आयोजित एकदिवसीय शृंखलामा वेस्ट इन्डिजले पाकिस्तानलाई हराएको थियो ।
त्यसयता क्यारेबियन भूमिमा खेलिएको ११ वटा एकदिवसीय शृंखलामा पाकिस्तानले वेस्ट इन्डिजलाई हराएको थियो । शृंखलाको पहिलो खेलमा पाकिस्तान पाँच विकेटले विजयी भएको थियो । दोस्रो खेलमा भने वेस्ट इन्डिजले पाकिस्तानलाई पाँच विकेटले हराएको थियो ।
