०४ साउन २०८३, सोमबार
गुण्डा नाइके भनिएका चक्रे मिलन भनिने मिलन गुरुङ भक्तपुर जिल्ला अदालतको आदेशमा धरौटीमा छुटेका छन् ।
भक्तपुरका जिल्ला न्यायाधीश रामप्रसाद न्यौपानेको इजलासले उनलाई १ लाख १० हजार धरौटीमा छाड्न आदेश जारी गरेको हो ।
बिहीबार मुद्दाको सुनुवाइ नभ्याएपछि शुक्रबार बयान र थुनछेक सकेर उक्त आदेश जारी गरिएको हो ।
जिल्ला प्रहरी परिसर भक्तपुरका प्रवक्ता एवं डीएसपी ढुण्डीराज नेउपानेका अनुसार तोकिएको धरौटी चक्रेले बुझाइसकेकाले उनी छुटेका हुन् ।
आफ्नो भतिज मनीष रायमाझीलाई २०८१, भदौ १० मा सानोठिमीस्थित दिव्यश्वरीमा रहेको बड्डाको तावा रेस्टुरेन्टमा आक्रमण गरेको भन्दै उनका काका दिनेशकुमार रायमाझीले चक्रेसहितका विरुद्ध प्रहरीमा जाहेरी दिएका थिए ।
मनीषका काका दिनेशका अनुसार सर्लाहीको हरिवन नगरपालिका– ४ घर भएका अजित खवाससहितका व्यक्तिले मनीषमाथि आक्रमण गरेका थिए । चक्रेकै निर्देशनमा आक्रमण भएको मनीषको जाहेरीमा उल्लेख थियो ।
गत बुधबार मात्र अभद्र व्यवहार कसुरमा काठमाडौं जिल्ला अदालतबाट धरौटीमा छुटेका चक्रे ज्यान मार्ने उद्योग कसुरमा भक्तपुर जिल्ला अदालतबाट पनि छुटेका हुन् ।
बुधबार काठमाडौं जिल्ला अदालतबाट धरौटीमा छुटे लगत्तै भक्तपुर प्रहरीले उनलाई नियन्त्रणमा लिएको थियो ।
