अमेरिकाको अलास्कामा राष्ट्रपति डोनाल्ड ट्रम्प र रूसी समकक्षी भ्लादिमिर पुटिनबीचको शिखर वार्ता शुरू भएसँगै युक्रेनमा व्यापक आक्रोश देखिएको छ ।

अमेरिकी भूमिमा पुटिनलाई ट्रम्प प्रशासनले दिएको रातो कार्पेट स्वागतले युक्रेनीहरू क्रुद्ध मात्र नभई घृणा र निराशाले भरिएका छन् ।

किभबाट रिपोर्टिङ गरिरहेका स्काई न्यूजका अन्तर्राष्ट्रिय मामिला सम्पादक डोमिनिक वाघोर्नले पुटिनको विमानको ढोकासम्म रातो कार्पेट ओछ्याउँदै गरेका अमेरिकी सैनिकहरूको फोटो अहिले सामाजिक सञ्जालमा भाइरल भइरहेको बताएका छन् ।

उनले भने, 'सामाजिक सञ्जालमा मानिसहरू देखिरहेको दृश्यप्रति क्रोध, आक्रोश र घृणाले भरिएका टिप्पणी गर्दैछन् । यस्तो प्रकारका कार्यक्रमका लागि कुनै राष्ट्रप्रमुखलाई स्वागत गर्ने विभिन्न तरिका हुन्छन् । तर, ट्रम्पले पुटिनलाई भव्य स्वागत गरेका छन् । यो युक्रेनीहरूलाई अत्यन्तै अपच भएको छ ।'

पुटिनबारे कठोर प्रतिक्रिया दिएका एक युक्रेनी नागरिकको भनाइ उदृत गर्दै उनले भने, 'उनी भूभाग कब्जा गर्छन्, शहरहरू नष्ट गर्छन्, हत्या, बलात्कार, लुटपाट, अपहरण र यातना दिन्छन् । अनि, अन्ततः उनलाई रातो कार्पेट ओछ्याएर स्वागत गरिन्छ ।'