१३ असार २०८३, शनिबार
मनसुनको न्यून चापीय रेखा सरदर स्थानभन्दा दक्षिणतिर अवस्थित रहेकाले नेपालमा मनसुन केही कमजोर भए पनि बंगालको खाडीबाट जलवाष्पयुक्त हावा भित्रिरहेको मौसम पूर्वानुमान महाशाखाले जनाएको छ।
हाल कोशी र सुदूरपश्चिमसहितका पहाडी भू–भागमा साधारणतया बदली रही हल्कादेखि मध्यम वर्षा भइरहेको छ भने तराईका अधिकांश स्थानमा आंशिक बदलीको अवस्था देखिएको छ।
जल तथा मौसम पूर्वानुमान महाशाखाका अनुसार बिहीबार कोशी, बागमती, गण्डकी, लुम्बिनी र सुदूरपश्चिम प्रदेशमा दिउँसो हिमाली तथा पहाडी क्षेत्रमा साधारण बदली रहँदै केही स्थानमा मध्यम वर्षाको सम्भावना रहेको छ ।
यसैगरी तराईमा आंशिक बदली रहेर थोरै स्थानमा वर्षा हुने छ । यस्तै राति हिमाल र पहाडका धेरै स्थानमा मध्यमदेखि भारी वर्षा हुने सम्भावना रहेको महाशाखाले जनाएको छ ।
मधेश प्रदेशमा दिउँसो आंशिक बदली रहेर थोरै स्थानमा वर्षा हुनेछ भने राति धेरै स्थानमा मध्यम वर्षा हुने महाशाखाको बुलेटिनमा उल्लेख छ ।
यसैगरी कर्णाली प्रदेशमा दिउँसो र राति दुवै समयमा हिमाली र पहाडी क्षेत्रमा साधारण बदली रहँदै केही स्थानमा वर्षा हुने सम्भावना रहेको छ ।
आज राति विशेषगरी बागमती, कोशी र सुदूरपश्चिम प्रदेशका पहाडी भू–भागमा मध्यमदेखि भारी वर्षा हुने सम्भावना समेत रहेकाले सचेत रहन महाशाखाले अनुरोध गरेको छ ।
