१३ असार २०८३, शनिबार
कर्णाली प्रदेशका मुख्यमन्त्री यामलाल कँडेलले नेपाली कांग्रेसका सभापति शेरबहादुर देउवासँग भेट गरेका छन् ।
एमाले स्थायी कमिटी सदस्य समेत रहेका कँडेल देउवालाई भेट्न बिहीबार बिहान उनकै निवास बूढानीलकण्ठ पुगेका हुन् ।
भेटमा समसामयिक राजनीतिसँगै, कर्णाली प्रदेश सरकारको काम कारबाही, विकास, समृद्धि र सुशासनका सम्बन्धमा छलफल भएको मुख्यमन्त्री कँडेलले जानकारी दिएका छन् ।
त्यसक्रममा देउवाले आफूलाई महत्त्वपूर्ण सुझाव र मार्गदर्शन प्रदान गरेको कँडेलले बताएका छन् ।
केन्द्रमा जस्तै कर्णालीमा पनि कांग्रेस-एमाले गठबन्धनको सरकार छ । सरकारको नेतृत्व एमालेका कँडेलले गरिरहेका छन् भने कांग्रेसका तर्फबाट चार मन्त्री छन् ।
पछिल्लो समय सत्ता सञ्चालनका विषयमा कर्णालीमा कांग्रेस एमालेसँग असन्तुष्ट छ । सत्ता साझेदार दुई दलबीचको मतभेद सार्वजनिक रूपमै देखिने गरेको छ ।
कर्णालीमा सत्ता साझेदार दल कांग्रेसबाटै सरकारको आलोचना भइरहेका बेला मुख्यमन्त्री कँडेलले देउवासँग भेट गर्नुलाई अर्थपूर्ण रूपमा हेरिएको छ ।
