१९ असार २०८३, शुक्रबार
गर्मीयाम शुरू भएसँगै नेपाली बजारमा पेप्सी कोला जस्तै देखिने पेय पदार्थहरूको विक्री वितरण बढेको पाइएको छ ।
विशेष गरी तराईका जिल्लाहरूदेखि काठमाडौंसम्मका क्षेत्रमा पेप्सी जस्तै देखिने नक्कली उत्पादनहरू देखिन थालेपछि कम्पनीले उपभोक्तालाई सतर्क रहन आग्रह गरेको छ ।
भारसँग सिमाना जोडिएका झापा, मोरङ, सुनसरी, सप्तरी, सिराहा, धनुषा, महोत्तरी, सर्लाही, रौतहट, बारा, पर्सा, चितवन, नवलपरासी (बर्दघाट सुस्ता पूर्व), नवलपरासी (बर्दघाट सुस्ता पश्चिम), रुपन्देही, कपिलवस्तु, दाङ, बाँके, बर्दिया, कैलाली र कञ्चनपुरलगायत जिल्लामा नक्कली उत्पादनहरूको बिगबिगी बढेको छ ।
पेप्सीको नेपालमा आधिकारिक वितरक वरुण वेभरेज नेपाल हो । वरुण वेभरेजले पेप्सी कोलाका सम्पूर्ण उत्पादन नेपालमै गर्ने गर्दछ । वरुणले पेप्सी, सेभन अप, मिरिन्डा, माउन्टेन ड्यूलगायत पेय पदार्थहरू उत्पादन तथा वितरण गर्दै आएको छ ।
नेपालको सफ्ट ड्रिङ्क बजारको करिब ४३ प्रतिशत हिस्सा ओगटेको वरुणले उत्पादन गरेजस्तै हुबहु नक्कल गरेका उत्पादनहरू त्यतिकै मात्रामा देखिन्छन् ।
बजारमा माउन्टेन ड्यिूको नक्कल गरी ‘मेन्टेन ड्यू’ मिरिन्डाको ‘मेरिन्डा’, सेभन अपको नक्कल ‘सेभन थम’लगायतका उत्पादनहरूको बिगबिगी छ ।
यसरी बजारमा नक्कल गरी उत्पादन गरिएको उत्पदानहरूले वास्तविक प्रोडक्टको टेस्ट र रोजाइलाई नकारात्मक प्रभाव पार्दै आएको छ । विशेष गरी खुल्ला बजारको अवधारणामा चलिरहेको नेपाल जस्तो देशमा वास्तविक ब्रान्डप्रति नै नेगेटीभीटी फैलिरहेको छ ।
नक्कली ब्रान्डको प्याकेजिङ, फन्ट, रङ र डिजाइन हुबहु अनुकरण गरिएको हुन्छ । जसले गर्दा उपभोक्ता अन्योलमा पर्दछ । सामान्य उपभोक्ताले यस्तो विषय छुटाउन सकिँदैन ।
वाणिज्य, आपूर्ति तथा उपभोक्ता संरक्षण विभागका अनुसार, गर्मी याममा चेकजाँच बढाइए पनि ग्रामीण बजार, साना पसल र खुला मेलामा नक्कली उत्पादनहरू बढी छिर्ने गरेका छन् ।
सबै क्षेत्रमा अनुगमन गर्न नसकिने भएकोले उपभोक्तालाई सचेत रहन विभागले आग्रह समेत गरेको छ ।
