अस्ट्रेलिया भ्रमणमा रहेको नेपाली क्रिकेट टोलीले आफ्नो अन्तिम अभ्यास खेलमा रोमाञ्चक जीत हासिल गरेको छ । शनिबार खेलिएको एकदिवसीय ढाँचाको क्रिकेटमा नेपाली टोलीले साउथ अस्ट्रेलियालाई दुई विकेटले हरायो ।

पहिले ब्याटिङ गरेको साउथ अस्ट्रेलियाले निर्धारित ४५ ओभरमा दुई सय ४२ रन बनाएको थियो ।

जवाफी ब्याटिङमा ओर्लिएको नेपाली टोलीले ४४.१ ओभरमा आठ विकेट गुमाएर दुई सय ४४ रन बनाउँदै विजयी लक्ष्य पार गर्‍यो ।

नेपाली टोलीको जीतमा कप्तान रोहितकुमार पौडेलले शतकीय योगदान गरे । कप्तान पौडेलले अविजित एक सय एक रन बनाए । उनले एक सय दुई बलको सामना गरी नौ वटा चौका पनि हिर्काए ।

रोहितले ५९ बलमा आफ्नो अर्धशतक पूरा गरेका थिए । नेपाली टोलीका लागि गुलसन झाले पनि ४० बलमा ३५ रनको योगदान गरे । रोहित र गुलसनले ८३ रनको साझेदारी गरेका थिए । यो साझेदारी टुटेपछि नेपाली टोलीको जितको सम्भावना कमजोर बनेको थियो ।

तर, सोमपाल कामीले रोहितसँग उत्कृष्ट तालमेल मिलाउँदै नेपाललाई जीतसम्म पुर्‍याए । सोमपालले ३० बलमा अविजित ३८ रन बनाए । यस क्रममा उनले दुई छक्का र दुई चौका पनि प्रहार गरे ।

नेपालका लागि ओपनर ब्याट्सम्यानद्वय आसिफ शेख र कुशल भुर्तेलले ३८ रनको साझेदारी गरेका थिए । आसिफ शेख ११ र कुशल भुर्तेल २८ रन बनाउँदै पेभेलियन फर्किए ।

भीम सार्की भने एक रनभन्दा अगाडि बढ्न सकेनन् । नेपाली टोलीले ४० रनको कुल स्कोरमा दोस्रो र ४५ रनमा तेस्रो विकेट गुमाएको थियो । आरिफ शेख तीन र दीपेन्द्रसिंह ऐरी नौ रन बनाउँदै आउट भए ।

यसअघि, खेलिएको साउथ अस्ट्रेलियाविरुद्धको दुवै टी–२० खेलमा नेपाली टोली पराजित भएको थियो । नेपाली टोली साउथ अस्ट्रेलियासँग पहिलो टी–२० मा तीन विकेटले र दोस्रो टी–२० मा तीन रनले हारेको थियो ।

नेपाली टोलीले यसअघि अस्ट्रेलियामै टप इन्ड सिरिजमा सहभागिता जनाएको थियो । नेपाली टोलीले यी दुवै शृंखला आगामी टी–२० विश्वकपको छनोट प्रतियोगिताको तयारीका क्रममा खेलेको हो ।

एसिया तथा प्रशान्त क्षेत्रको अन्तिम चरणको विश्वकप छनोट प्रतियोगिता आगामी अक्टोबर ८ देखि १७ तारिखसम्म ओमानमा आयोजना हुँदैछ । विश्वकप छनोट प्रतियोगितामा नेपालसहित नौ टोली सहभागी हुनेछन् ।

नेपालसँगै जापान र कुवेत प्रतियोगिताको समूह ‘बी’मा परेका छन् । मलेसिया, कतार र संयुक्त अरब इमिरेट्स (यूएई) समूह ‘ए’ मा छन् । समूह ‘सी’ मा भने आयोजक ओमान, पपुवा न्यू गिनी र समाओ रहेका छन् ।

अन्तिम चरणको उक्त छनोट प्रतियोगिताबाट तीनवटा टोली आगामी आईसीसी टी–२० विश्वकपमा पुग्नेछन् । आगामी टी–२० विश्वकप सन् २०२६ को फेब्रुअरी–मार्चमा भारत र श्रीलंकामा संयुक्त रुपमा आयोजना हुँदैछ ।