१८ असार २०८३, बिहीबार
कालीकोट, १० पुस– म्यादी प्रहरी विवेक ऐडीको मृत्युको विषयमा छानबिन गर्न गठन भएको समितिले आजबाट अनुसन्धान शुरु गर्ने भएको छ । घटनाबारे छानबिन गर्न गृह मन्त्रालयका सहसचिव डा. मानबहादुर विकको संयोजकत्वमा सरकारले समिति गठन गरेको थियो ।
छानबिनका लागि समिति कालीकोटमा रहेको छ । समितले सोमबार नै दुवै पक्षबीच छलफल गर्ने भएको छ । यही पुस ७ गते रातिबाट लगाइएको अनिश्चितकालीन कर्फ्यू पनि आजबाट हटाइएको छ ।
प्रहरी र म्यादी प्रहरीबीच शुक्रबार भएको झडपमा म्यादी प्रहरी ऐडीको मृत्यु भएको थियो । उनको मृत्यु भएपछि तनाव भएको कालीकोटमा सोही दिनबाटनै कर्फ्यू लगाएइको थियो ।
पीडित पक्षले मृतकलाई शहीद घोषणा, उचित क्षतिपूर्ति व्यवस्था र म्यादी प्रहरीको तलबका विषयमा भएको विवादबारे छानबिन हुनुपर्ने माग राखेर आन्दोलन चर्काएपछि कर्फ्यू लगाइएको हो ।
कर्फ्यू हटाइएको भएपनि प्रशासन असपासमा भने निषेधित क्षेत्र कायमै राखिएको जिल्ला प्रशासन कार्यालय कालीकोटले जानकारी दिएको छ ।
